Let pou Romin 15 - Nouvo Testaman Kreol Morisien Harmonisation NTPS KM

Nou bizin ed bann ki feb

¹ Nou ki for dan lafwa, nou bizin ed bann ki feb, e pa zis rod seki fer noumem plezir.

² Sakenn parmi nou bizin fer so prosin plezir pou so prop bien, pou ki li progrese dan lafwa.

³ Lekris pa ti fer limem plezir. Okontrer, dapre seki Lekritir dir, “Insilt ki ti pe avoy lor twa, finn tom lor mwa.”

⁴ Tou seki ti ekrir dan Lekritir lontan ti ekrir pou nou linstriksion, pou ki nou gagn lesperans par landirans ek rekonfor ki li donn nou.

⁵ Ki Bondie ki donn landirans ek rekonfor, li osi met lakorite ant zot dapre lexanp Zezi Kris,

⁶ pou ki zot tou ansam ek enn sel lavwa zot loue Bondie, Papa nou Segner Zezi Kris.

Lekris akeyir nou

⁷ Akeyir zot kamarad kouma Lekris finn akeyir zot pou laglwar Bondie.

⁸ Mo dir zot, Lekris ti vinn serviter bann Zwif pou prouv laverite Bondie, pou konfirm promes ki ti fer zot bann anset, bann patriars.

⁹ Li ti osi vini pou ki bann non-Zwif glorifie Bondie pou so konpasion, kouma finn ekrir: “Akoz sa mo pou loue twa devan bann nasion e mo pou sant pou to loner.”

¹⁰ Li osi deklare: “Loue Lesegner, zot tou, bann non-Zwif, ansam avek pep Bondie!”

¹¹ E ankor: “Sant so louanz, tou bann pep! E ki tou bann pep aklam li!”

¹² Izai osi ekrir: “Desandan Zese pou vini li pou leve pou gouvern bann non-Zwif e zot pou met zot lesperans dan li.”

¹³ Ki Bondie, lasours lesperans, ranpli zot ar lazwa ek lape par lafwa ki zot ena dan li, pou ki zot lesperans deborde par pwisans Lespri Sin.

Bann aktivite Pol

¹⁴ Mo bann frer, mo bann ser, mo ena konviksion ki zot ranpli ar bonte, ki zot ena tou konesans e ki zot kapav ansegn zot kamarad.

¹⁵ Mo finn ekrir zot avek boukou lodas dan mo let pou rapel zot sertin size. Mo fer sa akoz lagras ki Bondie donn mwa

¹⁶ pou vinn enn serviter Lekris Zezi pou bann non-Zwif. Mo akonplir travay sakre anons Bonn Nouvel Bondie pou ki lepep non-Zwif vinn enn ofrand ki fer Bondie plezir e ki sanktifie par Lespri Sin.

¹⁷ Dan linion avek Lekris Zezi mo kapav fier travay ki mo fer pou Bondie.

¹⁸ Mo oze koz selman lor seki Lekris finn fer atraver mwa pou amenn bann non-Zwif pou obeir Bondie. Li ti fer sa par parol ek aksion,

¹⁹ par pwisans sign ek mirak, par pwisans Lespri Sin. Mo finn repann Bonn Nouvel Zezi Kris plennman depi Zerizalem ziska provins Iliri.

²⁰ Mo lanbision ti touletan pou proklam Bonn Nouvel dan bann landrwa kot dimounn pa finn tann koz Lekris, pou ki mo pa mont enn travay lor fondasion poze par enn lot.

²¹ Mo azir dapre Lekritir: “Seki pa finn tann koz li, pou trouve, seki pa finn tande, pou konpran.”

Proze Pol pou vizit Rom

²² Samem rezon ki souvan finn anpes mwa vinn kot zot.

²³ Aster-la mo travay dan rezion isi finn termine. Depi plizir lane mo pe anvi rann zot vizit.

²⁴ Mo espere li pou posib letan mo lor larout pou al Lespagn, e ki zot kapav asiste mwa dan mo vwayaz apre ki mo finn pas enn bon moman avek zot.

²⁵ Me pou linstan mo an rout pou Zerizalem pou al servi bann krwayan laba,

²⁶ parski Masedwann ek Akai finn fer enn kolekt pou bann pov parmi bann krwayan dan Zerizalem.

²⁷ Zot ti desid sa par zotmem. An realite zot pran sa kouma enn det anver Zerizalem. Si bann non-Zwif finn gagn enn partaz dan benediksion spiritiel bann Zwif, li zis ki bann non-Zwif partaz zot benediksion materyel ar bann Zwif.

²⁸ Enn fwa sa travay-la termine e mo finn remet don ki finn ramase, mo pou al Lespagn, e mo pou pas kot zot.

²⁹ Mo kone ki letan mo vinn kot zot mo pou vinn avek benediksion Lekris an abondans.

³⁰ Mo fer enn lapel, mo bann frer, mo bann ser, par nou Segner Zezi Kris e par lamour ki Lespri Sin done: zwenn zot ansam ar mwa pou priye Bondie pou mwa.

³¹ Priye pou ki mo sap dan lame bann non-krwayan dan Zide, e ki bann krwayan pou aksepte mo servis dan Zerizalem.

³² Koumsa mo pou ariv kot zot ranpli ar lazwa, si li volonte Bondie, e mo pou gagn enn bon repo ki pou fer mwa dibien.

³³ Mo priye ki Bondie ki vre sours lape pou avek zot. Amen.