Let pou Romin 14 - Nouvo Testaman Kreol Morisien Harmonisation NTPS KM

Pa ziz lezot

¹ Akeyir seki feb dan lafwa, pa diskit bann lopinion.

² Lafwa enn dimounn permet li manz tou kiksoz, me enn lot ki so lafwa feb manz zis legim.

³ Fode pa ki dimounn ki manz tou, mepriz dimounn ki pa koumsa; e fode pa ki dimounn ki pa manz tou, kondann dimounn ki manz tou, parski Bondie aksepte li.

⁴ Kisann-la to ete pou ziz serviter enn lot? Si li tini ferm ou si li tonbe, sa regard so met. Me li pou tini ferm, parski Lesegner ena pouvwar pou soutenir li.

⁵ Pou enn dimounn, enn zour pli sakre ki enn lot; pou enn lot, toulezour parey. Sakenn parmi nou bizin ena so prop konviksion dan so leker.

⁶ Seki trouv enn zour spesial, li fer sa pou onor Lesegner. Seki manz laviann, li manze pou onor Lesegner, parski li rann aksiondegras Bondie; e seki pa manze, li onor Lesegner, e li rann aksiondegras Bondie.

⁷ Personn pa viv pou limem, e personn pa mor pou limem.

⁸ Si nou viv, nou viv pou Lesegner; si nou mor, nou mor pou Lesegner. Alor ki nou viv ou ki nou mor, nou apartenir ar Lesegner.

⁹ Lekris finn mor e li finn resisite pou ki li vinn Lesegner bann vivan ek bann ki finn mor.

¹⁰ Me twa, kifer to ziz to frer ou to ser? Kifer to mepriz to frer ou to ser? Nou tou enn zour pou bizin prezant nou devan Bondie pou li ziz nou.

¹¹ Lekritir deklare: “Bondie dir, ‘Mwa, Lesegner vivan, tou bann imin pou azenou devan mwa e tou pou konfese ki momem Bondie.’ ”

¹² Alor sakenn parmi nou bizin rann kont devan Bondie.

Pa fer lezot tonbe

¹³ Anou aret ziz nou kamarad. Servi zot zizman plito pou pa fer zot frer ou ser tom dan pese.

¹⁴ Par lafwa ki mo ena dan Lesegner Zezi, mo kone ek mo garanti ki nanye dan limem pa inpir. Me si kikenn panse ki enn kiksoz inpir, li inpir zis pou sa dimounn-la.

¹⁵ Si to bles enn frer ou enn ser akoz enn aliman ki to manze, alor to nepli pe azir par lamour. Pa les sa aliman ki twa to manze la koz lapert pou enn lot dimounn pou ki Lekris finn donn so lavi.

¹⁶ Pa les lezot dir move kiksoz lor seki twa to konsider bon.

¹⁷ An-efe, rwayom Bondie pa enn zafer manze ou bwar, me li konsern drwatir, lape ek lazwa ki Lespri Sin done.

¹⁸ Seki servi Lekris dan sa fason-la li agreab devan Bondie ek li aprouve par dimounn.

¹⁹ Anou rod seki amenn lape e permet nou progres ansam dan lafwa.

²⁰ Pa akoz size manze, nou al detrir seki Bondie finn fer. Tou manze bon, me li pa bon ki akoz enn manze, enn kikenn tom dan pese.

²¹ Li meyer ki evit manz laviann oubien bwar divin ou fer ninport ki kiksoz ki pou fer enn frer ou enn ser tonbe.

²² Seki to krwar lor sa size-la, gard li ant twa ek Bondie. Bienere sa dimounn ki pa santi li koupab dan bann swa ki li fer.

²³ Me seki konsians pa kler lor size manze, li kondane letan li manze, parski li pa pe azir par lafwa. Tou seki pa baze lor lafwa, li pese.