Let pou Romin 13 - Nouvo Testaman Kreol Morisien Harmonisation NTPS KM

Devwar anver bann lotorite

¹ Tou dimounn bizin obeir lotorite ki dirize, parski pena okenn lotorite ki existe san permision Bondie.

² Savedir seki revolte kont lotorite pe fer sa kont Bondie ki finn etablir sa lotorite-la. Seki fer sa pou amenn zizman lor limem.

³ Bann ki fer seki bien pa bizin per dirizan, me seki fer lemal ki bizin per. To pa oule gagn per lotorite? Abe fer seki bien e to pou gagn bann eloz,

⁴ parski dirizan-la li enn serviter Bondie pou to prop bien. Me si to pratik lemal, la to bizin ena lafreyer; pa pou nanye ki li ena pouvwar pou pini. Li enn serviter Bondie, li montre koler Bondie lor seki pratik lemal.

⁵ Akoz sa bizin obeir lotorite, pa selman pou evit pinision, me osi par devwar konsians.

⁶ Akoz sa osi ki zot bizin pey tax, parski bann-la pe donn zotmem pou akonplir sa travay-la kouma bann serviter Bondie.

⁷ Pey sakenn seki zot dwa: si zot ena tou kalite tax, pey bann tax-la; si zot dwa respe, donn respe; si li loner, donn loner-la.

Lamour pou nou prosin

⁸ Fode pa ena okenn det anver personn, exsepte dwa zot kamarad lamour. Seki kontan lezot, li akonplir lalwa.

⁹ An-efe, bann komannman: “Pa komet ladilter; pa pran lavi enn lot; pa kokin; pa dezir seki pou lezot” e tou lezot komannman ankor egal enn sel komannman: “Kontan to prosin kouma to kontan tomem.”

¹⁰ Lamour pa fer ditor so prosin. Alor lamour akonplir tou seki lalwa demande.

¹¹ Pran sa bien serye, parski zot kone dan ki letan nou pe viv. Ler finn arive pou ki zot sorti dan somey. Delivrans pli pre aster-la ki letan nou ti krwar premie fwa.

¹² Lanwit pe preske fini, lizour pe aprose. Anou aret pratik bann aksion ki fer dan lobskirite e anou pran bann zarm ki servi dan lalimier.

¹³ Anou konport nou onetman kouma anplin lizour; pa viv dan fiesta, soulezon, imoralite sexiel, vis, lager ek zalouzi.

¹⁴ Plito pran lor zot tou seki Lesegner Zezi Kris pe ofer e pa les zot antrene par zot prop natir pou satisfer so dezir.