Let pou Romin 12 - Nouvo Testaman Kreol Morisien Harmonisation NTPS KM

Nouvo lavi

¹ Alor, mo bann frer, mo bann ser, par konpasion ki Bondie ena pou nou, mo exort zot ofer zotmem kouma bann sakrifis vivan, sin e agreab, konsakre pou servi Bondie; sa vre adorasion ki zot ofer.

² Pa rant dan moul sa lemond-la, me les Bondie transform zot par enn intelizans nouvo, pou ki zot kapav diserne ki volonte Bondie, setadir seki bon, seki agreab, seki parfe.

³ Par lagras ki finn donn mwa, mo dir ar sakenn parmi zot fode pa ki zot ena enn lopinion tro ot lor zotmem; okontrer ena bann panse modes, sakenn dapre lafwa ki Bondie finn donn li.

⁴ Nou lekor ena plizir parti e sakenn ena so prop fonksion.

⁵ Dan mem fason, nou ki plizir, nou form enn sel lekor dan linion avek Lekris e sakenn apartenir ar lezot.

⁶ Nou ena diferan don dapre lagras ki finn akord nou. Si nou ena don profesi, nou bizin servi li dapre lafwa ki nou ena.

⁷ Si kikenn ena don servi, ki li servi bien; si kikenn ena don pou ansegne, ki li ansegne;

⁸ si kikenn ena don pou ankouraz lezot, ki li ankouraze; si li ena don pou partaz avek lezot, ki li fer sa avek zenerozite; seki dirize, bizin fer sa avek zel; seki ed bann malere, fer sa avek lazwa.

⁹ Lamour bizin sinser. Deteste seki move, atas zot ar seki bon.

¹⁰ Ena lafeksion pou zot kamarad kouma bann frer ek ser. Ena enn gran respe pou zot kamarad.

¹¹ Travay dir ek pa fer pares. Servi Lesegner avek enn lespri fervan.

¹² Montre lazwa dan lesperans, montre pasians dan detres, priye avek fidelite.

¹³ Partaz seki zot ena ar bann frer ek ser ki pena. Pratik lospitalite touletan.

¹⁴ Dimann benediksion Bondie lor bann dimounn ki persekit zot. Dimann li beni bann-la, pa modi zot.

¹⁵ Partaz lazwa avek bann ki dan lazwa, partaz lapenn avek bann ki dan lapenn.

¹⁶ Viv dan lakorite ant zotmem. Fode pa ena lorgey, me aksepte servi dan enn manier modes. Pa bizin ena enn tro gran lopinion lor zotmem.

¹⁷ Pa rann lemal pou lemal. Fer seki bien devan tou dimounn.

¹⁸ Otan ki posib viv dan lape ar tou dimounn.

¹⁹ Mo bann kamarad, pa rod tir vanzans zotmem, me les Bondie regle sa dan so zizman, kouma Lekritir dir: “Mwa ki pou tir vanzans, mwa ki pou regle kont.”

²⁰ Lekritir dir: “Si to lennmi gagn fin, donn li manze; si li gagn swaf donn li bwar. Si to azir koumsa, li pou ena laont kouma sarbon so ki finn ramas lor so latet.”

²¹ Pa les lemal ena laviktwar lor zot, okontrer zot ki bizin ena laviktwar lor lemal par seki bien.