Let pou Romin 11 - Nouvo Testaman Kreol Morisien Harmonisation NTPS KM

Bondie pa finn rezet Izrael

¹ Alor mo dimande: Eski Bondie ti rezet so pep? Pena sime! Momem mo enn Izraelit, enn desandan Abraam, mo sorti dan tribi Benzamin.

² Bondie pa ti rezet so pep ki li ti kone davans. Zot kone ki Lekritir dir letan Eli ti sipliye Bondie pou Izrael:

³ “Segner, zot finn touy to profet e finn demoli to bann lotel; finn res zis mo tousel, e zot pe rod touy mwa.”

⁴ Ki repons Bondie ti donn li? “Mo finn rezerv set-mil zom ki pa finn azenou devan Baal.”

⁵ Dan mem manier, dan letan prezan ena enn ti group dimounn ki reste, ki Bondie finn swazire par so lagras.

⁶ Si sa par lagras, alor li pa kapav par aksion ki zot ti fer, sinon lagras Bondie pa ti pou vremem lagras.

⁷ Ki arive alor? Lepep Izrael pa finn gagn seki li ti pe rode; zis sa ti group ki Bondie ti swazire la ki finn trouv lagras. Leres, zot leker finn vinn dir.

⁸ Lekritir dir: “Bondie ti donn zot enn lespri san-konpran, lizie ki pa trouve, zorey ki pa tande, ziska zordi.”

⁹ E David dir, “Ki zot fet vinn enn latrap, enn piez, enn lokazion pou zot tonbe, pou zot gagn zot pinision.

¹⁰ Ki zot lizie trouv som ziska zot vinn aveg, e ki zot ledo res kabose pou touzour.”

¹¹ Mo repoz enn kestion: Letan bann Zwif ti tonbe, eski enn tonbe ki pa kapav releve sa? Pa ditou! Me akoz zot fot bann non-Zwif finn sove, pou ki sa fer bann Zwif zalou.

¹² Si fot bann Zwif ti fer lemond vinn ris ar benediksion, si zot defet ti fer bann non-Zwif konn larises, panse aster-la ki kantite larises kapav deverse, si zot partisip totalman dan plan delivrans.

Delivrans pou bann Non-Zwif

¹³ Mo adres mwa ar zot, bann non-Zwif. Antan ki Zapot bann non-Zwif mo rann glwar Bondie pou mo minister

¹⁴ dan lespwar ki mo kapav fer mo prop pep zalou, koumsa de-trwa kapav sove.

¹⁵ Si, letan ti ekart zot, sa finn fer lemond rekonsilie li ar Bondie, kouma sa pou ete kan reintegre zot? Li koumadir seki mor pe regagn lavi!

¹⁶ Si pran enn premie morso dipin ek prezant li Bondie, alor dipin-la antie beni. Si rasinn enn pie, li sin, alor bann brans osi parey.

¹⁷ Si finn koup inpe brans lor pie zoliv, e twa, ki enn brans zoliv sovaz, finn gref twa lor sa pie-la ansam ar lezot brans, e to pe profit manze ki rasinn pe avoye,

¹⁸ pa mepriz bann brans koupe la. Si to fer fezer, abe mazinn sa: pa twa ki tini rasinn, me rasinn ki pe tini twa.

¹⁹ To kapav dir mwa, “Me finn koup sa bann brans-la zisteman pou fer plas pou gref mwa.”

²⁰ Sa li vre. Ti koup zot akoz zot ti mank lafwa, e twa to dan zot plas akoz lafwa ki to ena. Me pa pran enn ler arogan; okontrer montre boukou respe.

²¹ Si Bondie pa finn epargne brans natirel, to krwar li pou epargne twa?

²² Konsider bonte ek severite Bondie. Li sever ar bann ki ti tonbe, e li bon anver twa, si to kontign res dan so bonte. Sinon, pou koup twa kouma brans.

²³ Bann-la osi parey. Si zot pa kontign persiste dan zot infidelite, Bondie pou gref zot la kot zot ti ete avan. Bondie kapav donn zot plis ankor.

²⁴ Finn koup twa apartir enn pie zoliv ki par so natir li sovaz. Finn gref twa, kont natir, lor enn pie zoliv kiltive. Panse aster kouma Bondie pou plis replas bann brans natirel dan zot prop vre pie zoliv!

Mizerikord Bondie pou tou dimounn

²⁵ Mo bann frer, mo bann ser, mo anvi ki zot konn enn mister, pou ki zot pa konsider zotmem kouma bann tro gran saz. Mister-la, seki leker enn parti Izrael finn vinn dir pou enn letan selman, ziska ki lakantite bann non-Zwif konn Bondie.

²⁶ Koumsa tou Izrael pou sove, parey kouma Lekritir dir: “Liberater pou vinn depi Sion; li pou anlev tou inpirte dan desandan Zakob.

²⁷ Sa pou mo lalians avek zot letan mo anlev zot pese.”

²⁸ Konsernan Bonn Nouvel, bann Zwif lennmi Bondie, e sa tom bien pou zot, bann non-Zwif; me konsernan seki Bondie finn swazire, bann-la touzour bann dimounn ki Bondie kontan akoz zot anset,

²⁹ parski Bondie pa sanz so panse lor kisann-la li apele e kisann-la li beni.

³⁰ Kanta zot, bann non-Zwif, zot ti dezobeir Bondie dan lepase, me zordi zot finn gagn konpasion Bondie parski bann Zwif finn dezobeir.

³¹ Dan mem manier, aster-la bann Zwif finn dezobeir pou ki Bondie akord bann non-Zwif so konpasion; e ki bann Zwif osi aster-la gagn konpasion Bondie.

³² Parski Bondie finn anferm tou dimounn dan dezobeisans pou ki li montre so konpasion lor tou dimounn.

Tou laglwar pou Bondie

³³ Konbien larises Bondie li gran! Konbien so sazes ek so konesans profon! Kisann-la kapav explik so desizion? Kisann-la kapav konpran so plan?

³⁴ Kouma Lekritir dir: “Kisann-la konn panse Lesegner? Kisann-la kapav donn li konsey?

³⁵ Kisann-la ki finn donn Lesegner kiksoz an-premie pou ki an-retour li bizin rann zot kiksoz?”

³⁶ Tou sorti kot Bondie, tou existe par li e pou li. Tou laglwar pou Bondie pou touzour! Amen!