Let pou Romin 1 - Nouvo Testaman Kreol Morisien Harmonisation NTPS KM

¹ Mwa Pol, mo enn serviter Zezi Kris, enn zapot ki Bondie finn swazire ek apele pou pres so Bonn Nouvel,

² ki li ti promet depi bien lontan dan Lekritir sin par so bann profet,

³ Bonn Nouvel ki konsern so Garson, ki desandan David antan ki enn imin,

⁴ me dapre Lespri Sin, li deklare Garson Bondie avek enn gran pwisans kan ti resisit li depi bann mor.

⁵ Par li Bondie finn fer mwa lagras pou vinn enn zapot pou al apel dimounn parmi tou bann nasion pou krwar e pou obeir, e sa glorifie so nom.

⁶ E zot osi zot parmi seki Bondie ti apele pou Zezi Kris.

⁷ Mo pe ekrir pou tou bann ki dan Rom ki Bondie kontan e ki li finn apele pou swiv Zezi Kris. Ki Bondie nou Papa ek Lesegner Zezi Kris donn zot lagras ek lape.

Lapriyer ek Aksiondegras

⁸ Avan tou mo remersie mo Bondie, par Zezi Kris, pou zot tou, parski lemond antie pe koz zot lafwa.

⁹ Bondie mo temwin. Mo servi li ar tou mo leker par Bonn Nouvel ki mo anonse ki konsern Zezi Kris. Li kone ki mo pans zot touletan, sak fwa ki mo priye.

¹⁰ Mo demann Bondie, si sa dan so volonte, ki mo gagn lokazion vinn get zot.

¹¹ Mo anvi trouv zot pou ki mo kapav partaz ar zot benediksion ki Lespri Bondie done, pou fortifie zot.

¹² Seki mo oule dir, mo oule ki nou toule-de ankouraz nou kamarad par lafwa ki nou ena.

¹³ Bann frer, bann ser, mo anvi ki zot konpran ki souvan mo finn fer plan pou vinn kot zot, me sak fwa kiksoz anpes mwa. Mo ti anvi ki mo travay port so fri kot zot parey kouma kot bann lezot nasion.

¹⁴ Li mo devwar pou al kot tou dimounn, bann sivilize ek bann ki pa sivilize, bann edike, bann ki pa edike.

¹⁵ Akoz sa mo ena sa dezir pou amenn Bonn Nouvel kot zot, bann abitan Rom.

Pwisans Bonn Nouvel

¹⁶ Mo ena konfians total dan Bonn Nouvel. Limem lafors ki Bondie servi pou sov tou seki krwar, bann Zwif dabor, me osi bann non-Zwif.

¹⁷ Bonn Nouvel revel kouma Bondie amenn drwatir. Zis lafwa tousel ki fer sa, depi koumansman ziska lafin, parey kouma Lekritir deklare, “Dimounn ki drwat pou viv par lafwa.”

Limanite koupab

¹⁸ Depi lesiel lao, Bondie montre so koler kont tou pese e tou linzistis ki dimounn komet, e par sa bann move aksion-la zot touf laverite.

¹⁹ Pourtan Bondie limem finn montre klerman seki kapav kone lor li.

²⁰ Depi kreasion lemond bann kalite invizib Bondie, so pwisans eternel e so divinite, bien vizib letan nou get travay Bondie. Bann imin pena okenn exkiz.

²¹ Malgre ki zot konn Bondie, zot pa glorifie li, e zot pa remersie li; okontrer zot panse finn vinn bet, e zot lespri ki vid, finn plonz dan lobskirite.

²² Zot pretann zot saz, me ofet zot finn vinn fou

²³ letan zot sanz laglwar Bondie imortel pou bann zimaz ki resanble bann imin mortel, bann zwazo, zanimo ek reptil.

²⁴ Akoz sa Bondie finn abandonn zot dan zot aksion malprop, dapre dezir zot leker; samem ki zot fer seki pa bizin avek lekor zot kamarad.

²⁵ Zot finn ranplas laverite lor Bondie par enn mansonz, e zot finn ador ek servi seki Bondie finn kree olie zot servi Kreater limem, ki beni pou leternite! Amen.

²⁶ Akoz sa, Bondie finn abandonn zot dan zot dezir degradan. Mem zot bann fam finn sanz relasion natirel pou relasion ki kont natir.

²⁷ Dan mem manier, bann zom osi finn abandonn relasion natirel ar zot fam pou ena dezir pou lezot zom. Zom finn ena relasion indesan ar zom, e zot gagn pinision ki zot merite pou zot erer.

²⁸ Anplis, parski zot pa finn gard vre konesans Bondie dan zot lespri, li finn les zot lespri degringole, akoz sa zot fer seki pa bizin.

²⁹ Zot ranpli ar tou kalite linzistis, mesanste; zot gourman kiksoz lezot, zot ranpli ar lemal, zalouzi, lespri bagarer, fer krim, fer palab,

³⁰ pans dimal lor lezot, zot lennmi Bondie, zot insolan, arogan, vantar, zot invant tou kalite lide pou fer lemal, dezobeir bann paran;

³¹ zot pena konsians, pena lafwa, pena leker, pena pitie.

³² Zot konn zizman Bondie: seki viv koumsa merit lamor. Pourtan zot pa selman kontigne fer sa bann zafer-la, zot osi ankouraz lezot pou pratik sa.