Let pou Kolosien 3 - Nouvo Testaman Kreol Morisien Harmonisation NTPS KM

¹ Zot finn resisite avek Lekris, rod seki lao, la kot Lekris ete, dan kote drwat Bondie;

² rod seki lao e pa seki lor later.

³ Zot finn mor e zot lavi finn kasiet avek Lekris dan Bondie.

⁴ Ler Lekris, ki zot vre lavi, pou manifeste, lerla zot ousi zot pou manifeste dan laglwar ar li.

Nouvo lavi dan Kris

⁵ Tou seki fer parti lavi lor later an zot, fer li mor: limoralite, inpirte, lavi bakanal, bann move dezir ek lamour larzan ki enn form idolatri.

⁶ Ala seki atir lakoler Bondie,

⁷ ala seki ti zot konportman lontan, seki ti fer parti zot lavi.

⁸ Aster, zot bizin debaras tousala: lakoler, iritasion, mesanste, zoure ek bann move parol ki fransi zot lalev.

⁹ Fodepa ena mansonz ant zot, parski zot finn abandonn ansien natir, avek so bann pratik,

¹⁰ e zot finn adopte enn nouvo natir, ki pe kontign renouvle so konesans antan ki zimaz Bondie;

¹¹ la, pena ni Grek ni Zwif, ni seki sirkonsi ni seki pa sirkonsi, etranze, tribi pa sivilize, esklav, lib, me selman Lekris ki tou, Lekris dan zot tou.

¹² Zot, zot bann ki Bondie finn swazir, finn sanktifie, finn kontan, alor met dan zot leker bann santiman konpasion, bienveyans, imilite, douser, pasians.

¹³ Siport zot kamarad, e si zot ena kit repros, donn zot pardon; kouma Lesegner finn pardonn zot, zot ousi pardone.

¹⁴ Pli inportan ki tou, viv dan lamour, samem ki fer linite dan larmoni.

¹⁵ Ki lape Lekris regn dan zot leker, pou samem ki zot tou finn apele pou form enn sel lekor. Viv dan rekonesans.

¹⁶ Ki Parol Lekris prezan parmi zot dan tou so rises: ansegn zot prosin, fer zot ledikasion ar lasazes; par bann Psom, bann sante e bann kantik inspire par Lespri, sant zot rekonesans pou Bondie

¹⁷ Tou seki zot kapav dir ou fer, fer li dan nom Segner Zezi, e par li, rann gras Bondie Papa.

Nouvo relasion dan nouvo lavi

¹⁸ Bann madam, viv dan lakorite ek zot misie kouma bizin viv dan Lesegner.

¹⁹ Bann misie, kontan zot madam e zame pa maltret li.

²⁰ Bann zanfan, viv dan lakorite touletan ar zot paran, ala seki Lesegner atann de zot.

²¹ Bann paran, pa pous zot zanfan abou atansion zot dekouraze.

²² Bann esklav, dan tou kiksoz obeir zot bann met ki lor later. Servi zot, pa parski pe vey zot, kouma dir zot pe rod fer plezir bann imin, me ar enn leker ki sinp e ki ena lakrint pou Lesegner.

²³ Ninport ki travay zot pe fer, fer li ek enn bon leker, kouma dir pou Lesegner e non pou bann imin.

²⁴ Parski zot kone ki leritaz zot pou resevwar an rekonpans ar Lesegner. Se Lekris ki Lemet, e zot pe servi li.

²⁵ Si zot fer ditor, li pou ena so konsekans, e pa pou ena preferans pou personn.