Let pou Kolosien 2 - Nouvo Testaman Kreol Morisien Harmonisation NTPS KM

¹ Mo oule ki zot kone ki kalite lite mo pe lite pou zot, pou bann ki Laodise, e pou tou bann lezot ki zame pa finn trouv mwa personelman.

² Mo anvi zot leker pran kouraz e reini dan lamour, pou ki zot gagn rises, konpreansion ek enn konesans total mister Bondie: sa mister-la se Lekris limem;

³ tou bann trezor lasazes ek konesans, zot kasiet an li.

⁴ Mo dir zot sa pou ki personn pa tronp zot avek bel-bel koze.

⁵ Li vre ki mo lekor absan, me mo lespri ar zot e mo kontan trouv zot fidel e ferm dan zot lafwa pou Lekris.

Lavi konplet dan Kris

⁶ Kontign viv zot lavi dapre seki finn transmet zot lor Lekris Zezi Lesegner,

⁷ gard zot rasinn plante an li, tini ferm dan lafwa, dan manier ki finn ansegn zot, e les zot rekonesans deborde.

⁸ Pran gard ki personn pa piez zot dan bann gran lide, sa bann tronpri ki imin finn invante, anba lanpriz bann lafors ki dan liniver, e ki pena okenn lien avek Lekris.

⁹ Parski totalite natir Bondie res dan li, dan so lekor,

¹⁰ e zot trouv zot lakonplisman dan Lekris ki dominn tou bann Lespri e tou bann Lafors.

¹¹ Dan Lekris, zot finn resevwar enn sirkonsizion ki pa fer par bann imin e ki finn anlev pese ki ti dan zot limanite: se sa sirkonsizion-la ki dan Lekris.

¹² Zot finn plonze ar li dan batem, ar li zot finn resisite parski zot finn krwar dan lafors Bondie ki finn resisit li depi bann mor.

¹³ Zot ti finn mor akoz zot bann fot ek zot leker pa sirkonsi; aster Bondie finn donn zot lavi ar Lekris; li finn pardonn tou nou bann fot,

¹⁴ li finn rey sarz ki bann komannman ti pe fer pez lor nou; li finn fer li disparet, li finn koulout li lor lakrwa.

¹⁵ Li finn depouy bann Lespri e bann Lafors, tou dimounn trouve ki li finn dezarm zot, li finn trenn zot dan kortez laviktwar so lakrwa.

¹⁶ Aster-la, personn pa kapav kondann zot pou bann kestion manze-bwar, konsernan bann fet, nouvel linn oubien saba.

¹⁷ Tousala nek lonbraz bann realite ki pou vini e ki sorti depi Lekris.

¹⁸ Pa les personn kokin zot laviktwar par bann devosion, par lapriyer ar bann anz lor baz vizion e lintelizans imin ki gonfle ar pretansion.

¹⁹ Pa les personn detas zot ek Lekris ki latet, ki mintenir ansam lekor antie, ki gard li ini avek bann artikilasion ek bann ligaman, pou li grandi gras-a Bondie.

Mor ek viv avek Kris

²⁰ Zot finn mor avek Lekris, zot nepli soumi anba bann lafors sa lemond-la; kifer zot pou obeir bann regleman kouma dir zot lavi depann lor la:

²¹ “Pa pran, pa goute, pa touse”?

²² Tousala pou bann kiksoz ki pou dekonpoze letan itilize; samem ki apel komannman ek doktrinn imin sa!

²³ Zot bon rod pran laparans lasazes: relizion personel, devosion, privasion; tousala pena okenn valer pou metriz bann dezir nou prop natir.