Let pou Kolosien 1 - Nouvo Testaman Kreol Morisien Harmonisation NTPS KM

Salitasion

¹ Mwa Pol, zapot Zezi Kris par volonte Bondie, ek frer Timote.

² Zot bann disip ki dan lavil Kolos, bann frer e bann ser fidel dan Lekris: Ki labonte ek lape Bondie nou Papa res lor zot.

Aksiondegras

³ Dan lapriyer ki nou fer pou zot, nou remersie touletan Bondie, Papa nou Segner Zezi Kris,

⁴ parski nou finn tann koz zot lafwa dan Zezi Kris ek zot lamour pou tou bann disip,

⁵ akoz sa lesperans ki pe atann zot dan lesiel; zot finn tann lanons sa lesperans-la avan, par Bonn Nouvel, Parol laverite

⁶ ki finn ariv ziska zot; mem fason ki li pe donn so fri e li pe progrese dan lemond antie, mem fason li pe azir parmi zot depi zour zot finn resevwar li e vremem zot finn konn labonte Bondie.

⁷ Zot finn aprann sa par Epafras, nou kamarad e nou konpagnon dan servis. Li enn minis fidel Lekris ki finn travay dan nou plas.

⁸ Li finn dekrir nou lamour ki anim zot dan Lespri.

⁹ Ala kifer, depi sa zour-la, nou pa aret priye pou zot. Nou demann Bondie ki zot gagn foul konesans so volonte avek tou lasazes ek lintelizans spiritiel,

¹⁰ pou ki zot amenn enn lavi dign Lesegner, e ki zot rod fer li plezir. Par tou seki zot pou fer de bon, zot pou prodir bann fri e zot pou progrese dan vre konesans Bondie.

¹¹ Lafors so laglwar pou fortifie zot par tou fason e pou amenn zot ver enn perseverans ek enn pasians ki siport tou. Dan lazwa,

¹² remersie Bondie Papa ki finn fer zot gagn zot par dan leritaz bann disip dan lalimier.

¹³ Li finn aras nou dan pouvwar teneb e li finn transfer nou dan Rwayom so Garson bieneme;

¹⁴ li finn delivre nou e li finn pardonn nou pese.

Kris e so travay

¹⁵ Li rann vizib Bondie ki invizib, Premie-ne parmi tou bann kreatir,

¹⁶ parski tou seki existe dan lesiel e lor later finn kree an li, bann kreatir vizib ek bann invizib, bann Lespri ek bann Lafors. Tou finn kree par li ek pou li.

¹⁷ Li, li avan tou kiksoz e tou existe an li.

¹⁸ Li, li latet lekor Legliz. Li koumansman, Premie-ne parmi bann mor, pou ki li tenir so premie ran dan tou.

¹⁹ Bondie finn kontan fer tou repoz an li

²⁰ e rekonsilie tou par li e pou li, lor later ek dan lesiel, letan li finn etablir lape par disan so lakrwa.

²¹ E zot, lontan, zot ti etranze e lennmi Bondie, letan zot ti pe komet bann move aksion,

²² aster Bondie finn rekonsilie zot par lekor ek laser so Garson, par so lamor, pou fer zot paret devan li, sin, san repros, san fay.

²³ Me bizin ki, par lafwa, zot res solid ek ferm, san ki zot tom andeor lesperans ki vinn par Bonn Nouvel ki zot finn tande, ki finn proklame ar tou kreatir anba lesiel. Mwa Pol mo finn vinn serviter sa Bonn Nouvel-la.

Pol kouma enn serviter Legliz

²⁴ Aster mo trouv mo lazwa dan bann soufrans ki mo soufer pou zot e mo konplet dan mo laser seki manke dan leprev ki Lekris finn aksepte pou so lekor ki apel Legliz;

²⁵ mo finn vinn serviter par sarz ki Bondie finn konfie mwa pou zot: fer konn Parol Bondie,

²⁶ sa mister ki ti res kasiet pandan bien lontan e ki aster Bondie finn devwale ar so bann krwayan.

²⁷ Li finn anvi fer zot konn rises ek laglwar sa mister-la parmi bann pep: Lekris parmi zot, lesperans laglwar!

²⁸ Limem ki nou pe anonse; nou pe inform sakenn, nou pe instrir sakenn ek tou lasazes, pou fer li grandi spiritielman dan so relasion avek Lekris.

²⁹ Se pou sa ki mo travay, ki mo lite avek tou so lafors ki azir avek pwisans dan mwa.