Let pou Filipien 2 - Nouvo Testaman Kreol Morisien Harmonisation NTPS KM

Imilite e grander Lekris

¹ Si zot linion avek Kris ankouraz zot, so lamour rekonfort zot e so Lespri ini zot e rann zot konpatisan,

² alor rann mwa osi zwaye par lakorite ant zot; ena enn sel leker, enn sel lamour e rod touzour linite.

³ Pa fer nanye par rivalite, me avek imilite, konsider lezot meyer ki zotmem.

⁴ Pa rod zot prop lintere, me rod lintere lezot avan.

⁵ Ena samem konportman-la parmi zot e pans parey kouma Zezi Kris finn panse.

⁶ Zezi, mem si li touletan ti ena natir Bondie, li pa finn anvi vinn egal ar Bondie.

⁷ Li finn limem renons tou, li finn pran kondision enn esklav, li ti vinn imin e ti rekonet li dan so form imin.

⁸ Li ti abes limem, li ti obeisan ziska lamor, lamor lor lakrwa.

⁹ Akoz samem Bondie finn elev li pli lao ki tou, e finn donn li enn nom ki pli gran ki tou nom

¹⁰ pou ki devan nom Zezi tou dimounn lor later kouma dan lesiel tom azenou,

¹¹ e tou dimounn pou proklam ki Zezi Kris limem Segner, pou laglwar Bondie Papa.

Briye kouma lalimier dan lemond

¹² Mo bann kamarad, zot finn touletan obeisan ler mo ti avek zot, aster ki mo absan, zot bizin plis obeisan ankor. Dan imilite ek reverans, travay pou zot delivrans,

¹³ parski Bondie pe fer so travay dan zot, li inspir zot pou fer zot ena volonte pou realiz tou dapre so bon plan.

¹⁴ Fer tou san okenn konplint ou rezistans

¹⁵ pou ki zot vinn bann zanfan Bondie san defo e san repros omilie sa lemond move ek perverti la. Zot bizin briye parmi zot kouma zetwal dan lesiel.

¹⁶ Parski zot finn port mesaz ki donn lavi, zour Lesegner li pou enn fierte pou mwa. Mo pou kone ki mo pa finn galoupe ek travay pou nanye.

¹⁷ Mem si mo disan bizin fane pou sakrifis ek servis zot lafwa, mo zwaye e mo rezwir avek zot tou.

¹⁸ Zot bizin rezwir zot osi e partaz zot lazwa avek mwa.

Timote e Epafrodit

¹⁹ Mo swete avoy zot Timote biento; li pou enn lankourazman pou mwa pou gagn zot nouvel.

²⁰ Mo pena personn isi kouma li, pou pran swin zot bienet.

²¹ Zot tou pe rod zot prop lintere e non pa seki konsern Zezi Kris.

²² Me zot konn Timote bien, li finn fer so prev; kouma enn garson ki travay anba lotorite so papa, zot kone li finn touzour akote mwa pou anons Bonn Nouvel.

²³ Mo espere avoy limem kot zot dimoman ki mo kler lor mo prop sitiasion,

²⁴ e mo konfian dan Lesegner ki biento momem mo pou vinn kot zot.

²⁵ Mo finn deside ki mo bizin avoy osi nou frer Epafrodit, enn mo koleg travay, limem zot ti avoye pou ed mwa.

²⁶ Li ena enn gran dezir retrouv zot tou e li ti inkie ler li ti kone ki zot ti gagn nouvel so maladi.

²⁷ Vremem li ti bien-bien malad, me Bondie finn pitie li, pa zis pou li me pou mwa osi, pou anpes mwa vinn pli tris ankor.

²⁸ Pou sa rezon-la, mo prese pou avoy li kot zot. Li pou enn gran lazwa pou zot kan zot retrouv li e sa pou rann mwa mwin tris.

²⁹ Avek tou zot leker, akeyir li dan zot kominote. Zot bizin ena boukou lestim pou dimounn parey kouma li.

³⁰ Li ti manke mor akoz travay Bondie. Li finn riske so lavi pou li kapav ed mwa, kiksoz ki zot pa pe kapav fer zotmem.