Let pou Filipien 1 - Nouvo Testaman Kreol Morisien Harmonisation NTPS KM

Salitasion

¹ Mwa Pol ek Timote, serviter Zezi Kris. Nou pe ekrir lepep Bondie dan Filip, zot bann levek ek bann diak.

² Ki lagras ek lape Bondie nou papa ek nou Segner Zezi Kris res ar zot.

Lapriyer ek remersiman

³ Sak fwa ki mo pans zot, mo remersie Bondie:

⁴ sak lapriyer ki mo fer pou zot, li touzour avek lazwa ki mo priye,

⁵ akoz koudme ki zot finn donn mwa pou anons Bonn Nouvel depi premie zour ziska zordi.

⁶ Mo sir ki Bondie ki finn koumans enn bon travay dan zot la, pou kontigne travay-la ziska lafin, ziska zour Zezi Kris.

⁷ Zot okip enn plas spesial dan mo leker. Li normal ki mo ena sa kalite santiman-la pou zot. Zot finn partisip dan lagras ki Bondie finn donn mwa ler mo ti dan prizon e kan mo ti pe defann ek konfirm Bonn Nouvel.

⁸ Bondie, li temwin, ki kantite mo anvi trouv zot. Li kone mo pran zot swin parey kouma Zezi Kris.

⁹ Mo priye ki zot lamour pou kontigne grandi boukou, ansam avek vre konesans ek konpreansion

¹⁰ pou ki zot kapav disern seki bien. Lerla zot pou pir ek san repros letan Kris revini,

¹¹ zot pou ranpli ar fri lazistis ki sorti kot Zezi Kris pou laglwar ek louanz Bondie.

Kris limem lavi

¹² Mo bann frer e ser, mo oule ki zot kone ki seki finn ariv mwa finn vremem kontribie pou fer avans Bonn Nouvel.

¹³ Tou dimounn, dan pale gouverner ek partou deor, konn bien ki mo dan prizon akoz mo pe servi Kris,

¹⁴ e mo letan dan prizon finn ankouraz boukou mo bann frer e mo bann ser dan Lesegner, e zot pli solid aster-la pou anons Parol Bondie san okenn laper.

¹⁵ Li vre ki ena ki anons Kris par lanvi ek zalouzi, me lezot fer li avek enn bonn volonte.

¹⁶ Sa bann-la zot azir par lamour, parski zot kone ki Bondie finn donn mwa mision pou defann Bonn Nouvel.

¹⁷ Lezot pa pe proklam Kris par sinserite, me pe azir par rivalite. Zot zis anvi koul mwa ankor plis dan prizon.

¹⁸ Pa fer nanye! Seki inportan, mem avek aryer panse ou dan laverite, ki zot anons Kris. Akoz samem mo dan lazwa. Mo pou kontigne rezwir ankor,

¹⁹ parski mo kone ki tousala pou amenn mo delivrans gras-a zot lapriyer ek led Lespri Zezi Kris.

²⁰ Mo pli gran dezir ek lesperans, ki mo vinn laont lemond, me ki avek enn gran kouraz, aster-la e pou touzour, ki Kris pou onore dan mwa, swa par mo lavi oubien mo lamor.

²¹ Pou mwa Kris limem mo lavi e lamor pou donn mwa plis ankor pou viv.

²² Me si kontign mo lavi isi lor later pou permet mwa fer enn travay itil, la mo pa kone ki mo pou swazir.

²³ Mo dan enn dilem. Mo anvi mor pou al avek Kris, seki ti pou bon pou mwa.

²⁴ Me, akoz zot, li pli inportan ki mo viv isi lor later.

²⁵ Mo ena enn gran konviksion e mo sir ki mo pou res isi, e viv avek zot tou pou ed zot progrese dan lazwa ek lafwa.

²⁶ Kan mo retourn kot zot ankor, zot pou ena plis rezon pou fier akoz zot lafwa dan Zezi Kris.

²⁷ Me selman, amenn zot lavi dapre Bonn Nouvel Lekris. Mem si mo vinn get zot ou pa, mo espere tande ki zot pe tini ferm dan enn sel lespri pou lit ansam pou fer lafwa avanse dapre Bonn Nouvel.

²⁸ Zot bizin touzour brav kan zot zwenn zot adverser. Sa pou enn sign pou bann-la ki zot pe al ver zot destriksion; me pou zot, mo bann frer, mo bann ser, li enn sign zot delivrans, enn delivrans ki sorti kot Bondie.

²⁹ Zot finn gagn privilez pou non selman krwar dan Kris me osi soufer pou li.

³⁰ Zot pe amenn mem konba ki zot finn trouv mwa pe amene e kouma zot kone mo ankor pe amene.