Let pou Filemon 1 - Nouvo Testaman Kreol Morisien Harmonisation NTPS KM

Salitasion

¹ Mwa Pol, ki dan kaso akoz mo travay pou Zezi Kris, ansam avek nou frer Timote, pe ekrir twa mo frer Filemon, twa ki enn pros kolaborater.

² Nou ser Apia, Arsipous nou kamarad dan lalit ek tou bann manb legliz ki reini dan to lakaz:

³ Ki Bondie nou papa ek Segner Zezi Kris, akord zot so lagras ek so lape.

Lamour ek lafwa Filemon

⁴ Sak fwa ki mo priye, mo pans twa e mo remersi Bondie,

⁵ parski mo finn tann bann bon koze lor to lamour pou tou bann frer krwayan ek to lafwa ferm dan Segner Zezi.

⁶ Mo priye ki sa lafwa ki nou partaze la, fer nou konpran pli bien sak benediksion ki nou resevwar letan nou res ini avek Kris.

⁷ Frer, to lamour finn donn mwa boukou lazwa ek lankourazman parski to finn rekonfort leker bann krwayan.

Pol fer enn reket dan faver Onezim

⁸ Pou sa rezon-la, mem si mo santi mo ena ase lotorite dan Kris pou donn twa lord pou fer to travay,

⁹ pourtan mo pou plito fer twa enn lapel baze lor lamour. Mwa, Pol, enn vieyar, anplis aster-la enn prizonie Zezi Kris,

¹⁰ mo fer enn reket pou Onezim ki mo finn pran pou mo zanfan dan Kris.

¹¹ Enn letan li ti initil pou twa, aster-la li itil pou nou toule-de.

¹² Mo pe retourn li kot twa, li ki vinn enn parti mo leker.

¹³ Mo ti pou kontan gard li ar mwa pou li kapav servi dan to plas letan ki mo dan prizon akoz Bonn Nouvel Zezi Kris.

¹⁴ Me mo pa anvi fer kiksoz san to konsantman pou ki to bonte pa vinn enn obligasion me to prop volonte.

¹⁵ Kikfwa, akoz samem ki li finn separe ar twa, pou ki to kapav regagn li pou touzour,

¹⁶ pa kouma esklav, me pli meyer ki enn esklav, kouma enn frer bieneme, spesialman pou mwa, me ankor plis pou twa dan to lavi ek dan Lesegner.

¹⁷ Alor si to konsider mwa kouma to partner, akey li osi parey kouma to ti pou fer pou mwa.

¹⁸ Si zame li finn fer twa ditor, oubien li dwa twa kiksoz, met sa lor mo kont.

¹⁹ Mwa, Pol pe ekrir sa avek mo prop lame, mo pou ranbours twa. Mo pa anvi rapel twa ki to dwa mwa to prop lavi.

²⁰ Wi, mo frer, rann mwa enn servis pou lamour Lesegner; rekonfort mo leker dan Kris.

²¹ Mo sir ki letan mo pe ekrir twa to pou fer seki mo pou demann twa, e to pou fer plis ankor.

²² Anmemtan to prepar enn lasam pou mwa, parski mo pe espere gagn mo liberte par zot lapriyer.

Salitasion final

²³ Mo kamarad dan Zezi Kris, Epafras, li fer zot konpliman;

²⁴ Mark osi, Aristark, Delmas ek Lik mo bann kamarad travay.

²⁵ Ki lagras Segner Zezi Kris li res ar twa.