Ga 6 - Nouvo Testaman Kreol Morisien Harmonisation NTPS KM

Fer dibien zot kamarad

¹ Mo bann frer, mo bann ser, si kikenn arive tom dan pese, zot ki ena Lespri Bondie, avek douser zot bizin ramenn li dan bon sime. Pran bien kont zotmem pou zot pa tom dan tantasion.

² Sakenn bizin ed so kamarad, lerla zot pou met an pratik lalwa Lekris,

³ parski si kikenn panse ki li enn gran dimounn alor ki li nanye ditou, li pe anbet limem.

⁴ Sakenn bizin examinn so prop travay, e si li bizin fer vantar, fode pa li fer li an konparezon avek so prosin me par rapor avek limem.

⁵ Sakenn pou bizin sarye so prop fardo.

⁶ Dimounn ki resevwar lansegnman, bizin vinn enn partner avek seki finn donn li lansegnman.

⁷ Fode pa fer erer, nou pa kapav mok Bondie. Enn dimounn li rekolte seki li finn seme.

⁸ Si li sem dapre so natir imin, li pou rekolte koripsion; si li sem dapre Lespri, li pou rekolte lavi eternel.

⁹ Anou pa dekouraze fer dibien, parski ler peryod larekolt arive nou pou rekolte si nou pa bes lebra.

¹⁰ Alor, tan ki nou ena letan, anou travay pou bien tou dimounn spesialman pou bann ki pros avek nou dan lafwa.

Avertisman e salitasion

¹¹ Zot trouve, mo pe ekrir zot sa bann gro-gro let-la avek mo prop lame.

¹² Sa bann dimounn ki anvi zot fer sirkonsizion-la, zot oule zis fer remark zot dan bann zafer laser. Zot fer sa pou ki zot pa persekite akoz lakrwa Lekris.

¹³ Parski mem bann ki resevwar sirkonsizion pa obeir lalwa; sa bann dimounn-la anvi ki zot sirkonsi pou zot fer vantar ki zot finn kapav inpoz sa sign-la lor zot.

¹⁴ Abe mwa, mo pou fer vantar akoz lakrwa nou Segner Zezi Kris; par sa lakrwa-la lemond finn fini krisifie pou mwa e mo finn fini krisifie pou lemond.

¹⁵ Ki enn dimounn sirkonsi ou pa, sa pena okenn linportans; seki inportan se enn nouvo kreasion.

¹⁶ Tou dimounn ki mars dapre sa prinsip-la, lape ek mizerikord pou ar zot ek Izrael pep Bondie osi.

¹⁷ Finalman, ki personn pa fatig mwa parski mo sarye mark Zezi lor mo lekor.

¹⁸ Mo bann frer, mo bann ser, ki lagras nou Segner Zezi Kris li ar zot lespri. Amen.