Ga 5 - Nouvo Testaman Kreol Morisien Harmonisation NTPS KM

Lekris rann nou lib

¹ Kris finn liber nou pou ki nou vinn vremem lib. Alor zot bizin tini ferm, pa les zot kraze anba fardo lesklavaz ankor.

² Ekout bien seki mwa Pol mo pe dir zot: si zot les zot sirkonsi, Kris pa pou ena okenn valer pou zot.

³ Ankor enn fwa, mo dir zot; tou dimounn ki les li sirkonsi, li pou oblize pratik lalwa an-antie.

⁴ Si zot sey vinn drwat devan Bondie par lobeisans lalwa, zot koup zot avek Kris, ek zot met zotmem andeor so lagras.

⁵ Pou nou, par Lespri ek par lafwa, nou atann dan lesperans ki Bondie rann nou zis.

⁶ Pou kikenn ki avek Zezi Kris, sirkonsizion ou pa sirkonsizion, sa pena okenn linportans; lafwa ki azir par lamour ki konte.

⁷ Zot ti pe bien galoup zot lekours. Alor ki finn kas zot lelan pou anpes zot obeir laverite?

⁸ Sa linflians-la pa vinn depi kot Bondie ki finn apel zot!

⁹ Enn tigit levin fer lapat an-antie gonfle.

¹⁰ Mo ena konfians dan Bondie ki zot pa pou pran enn lot direksion. Ninport kisann-la ki pe met dezord parmi zot, li pou gagn so pinision.

¹¹ Me si mwa mo ankor pe pres sirkonsizion, alor kifer zot pe persekit mwa? Dan sa ka-la, Lekris lor lakrwa nepli enn skandal.

¹² Mo swete ki sa bann dimounn ki pe fatig zot-la, zot al pli lwin ankor dan zot pratik sirkonsizion ziska koup li net.

¹³ Me zot, mo bann frer ek ser, finn apel zot pou ki zot lib. Selman fode pa zot mal servi zot liberte e viv dapre zot prop natir imin. Okontrer, les zot gide par lamour e met zot oservis zot bann kamarad.

¹⁴ Parski tou lalwa li kapav rezime dan enn sel parol: “Kontan to prosin kouma tomem.”

¹⁵ Me si zot mord e devor zot kamarad, fer atansion, sinon zot pou fini par detrir zot kamarad.

Lespri e natir imin

¹⁶ Mwa, mo dir zot: les zot lavi dirize par Lespri, lerla zot pa pou viv dapre dezir laser imin.

¹⁷ Parski bann dezir laser zot kontrer Lespri e bann dezir Lespri zot kontrer laser. Zot telman opoze ki dimounn pa kapav fer seki zot anvi.

¹⁸ Me si Lespri kondir zot, zot nepli soumet anba lalwa.

¹⁹ Nou bien kone kouma laser li manifeste li dan limoralite, linpirte, vis,

²⁰ lidolatri, sorselri, mazik, laenn, dispit, zalouzi, koler, rivalite, lager,

²¹ lanvi, soulezon, fiesta, ek tou sort kalite lezot move aksion. Mo averti zot parey kouma mo finn fer li avan, tou bann dimounn ki pratik sa bann kiksoz-la, zot pa pou erit Rwayom Bondie.

²² Me bann fri ki Lespri li prodir, li lamour, lazwa, lape, pasians, bonte, konpreansion, fidelite,

²³ douser, kontrol so prop lekor, pena lalwa kont sa bann kiksoz-la

²⁴ e bann ki viv ini avek Kris, zot finn krisifie zot prop laser ek zot bann pasion ek dezir.

²⁵ Si nou viv dapre Lespri, anou osi mars dapre Lespri.

²⁶ Anou pa fer vantar, nou pa dispit avek kamarad, nou pa zalou kamarad.