Ga 4 - Nouvo Testaman Kreol Morisien Harmonisation NTPS KM

¹ Mo anvi dir zot ki osi lontan ki eritie-la enn zanfan, li pa diferan ar enn esklav, mem si li proprieter.

² Me li res anba responsabilite total bann garan ek bann administrater ki pran desizion pou li ziska ler ki finn fixe par so papa.

³ Parey avek nou osi, letan nou ti ankor zanfan, nou ti gouverne par bann lafors ki pe azir dan sa lemond-la.

⁴ Me letan ler fixe arive, Bondie ti avoy so Garson; enn fam inn donn li nesans, li ti soumet anba lalwa,

⁵ pou delivre bann ki anba lalwa, pou ki Bondie adopte nou kouma so bann zanfan.

⁶ E parski zotmem so bann zanfan, Bondie finn avoy Lespri so Garson dan nou leker, Lespri ki kriye “Abba, Papa!”

⁷ Alor to nepli esklav me zanfan Bondie. E parski to so zanfan, to osi so eritie.

Pol gagn traka pou bann Galat

⁸ Lontan letan zot pa ti konn Bondie, zot ti esklav bann bondie ki par zot natir zot fos.

⁹ Me aster-la zot konn Bondie - ou plito aster-la Bondie konn zot - kouma zot kapav retourn ankor anba sa bann move lespri ki feb ek pov-la? Zot anvi revinn esklav bann-la ankor?

¹⁰ Zot donn boukou linportans sertin zour, mwa, sezon ek lane!

¹¹ Zot fer mwa sagrin ki mo finn perdi mo letan travay ar zot.

¹² Mo bann frer e ser, mo sipliy zot, vinn parey kouma mwa; parski mo finn vinn parey kouma zot. Zot pa ti maltret mwa.

¹³ Zot kone, akoz enn maladi ki mo finn anons zot Bonn Nouvel pou premie fwa.

¹⁴ Mem si mo kondision lasante ti enn eprev pou zot, zot pa finn inior mwa; okontrer zot finn resevwar mwa kouma enn anz Bondie, kouma Zezi Kris limem.

¹⁵ Kot sa lazwa-la finn pase? Mo temwin ki si zot ti kapav aras zot lizie pou donn mwa, zot ti pou fer li.

¹⁶ Eski aster mo vinn zot lennmi parski mo dir laverite?

¹⁷ Sa bann dimounn-la pe donn zot boukou latansion me zot lintansion pa bon. Zot anvi separ mwa avek zot, pou lerla tou latansion vinn pou zot.

¹⁸ Aster-la, li bien bon gagn boukou latansion, si li pou enn bon rezon, pa selman letan mo avek zot.

¹⁹ Mo bann zanfan, mo pe soufer ankor pou zot kouma enn fam ansint ki pre pou donn nesans enn baba, ziska ki Kris pran form dan zot.

²⁰ Komie dan mo leker mo ti pou anvi avek zot la, pou adres zot enn lot fason parski mo vremem pa kone ki pou fer pou zot.

Lexanp Agar ek Sara

²¹ Dir mwa, zot ki anvi soumet zotmem anba lalwa, eski zot pa tande seki lalwa dir?

²² Li dir ki Abraam ti ena de garson, enn avek enn fam esklav e lot-la avek enn fam lib.

²³ Garson fam esklav-la ti ne dapre laser, me lot-la, garson fam lib la ti ne dapre enn promes Bondie.

²⁴ Sa zistwar la, li osi ena enn lot sinifikasion. De fam la reprezant de lalians. Enn lalians sorti Sinai li donn nesans bann zanfan esklav: sa Agar, sa.

²⁵ Agar li montagn Sinai dan Larabi e li reprezant Zerizalem zordi, parski li dan lesklavaz ar so bann zanfan.

²⁶ Me Zerizalem ki lao dan lesiel, li lib e limem nou mama.

²⁷ Finn dir dan Lekritir: “To bizin kontan, fam steril ki pa gagn zanfan; kriye to lazwa for-for, twa ki pa konn douler lakousman; parski fam ki abandone pou gagn plis zanfan ki fam ki ena so mari.”

²⁸ Mo bann frer, mo bann ser, parey kouma Izaak, zot osi zot bann zanfan promes Bondie.

²⁹ Sa lepok-la garson ki finn ne dapre laser ti persekit lot ki ti ne dapre Lespri, e zordi ankor, mem zafer pe arive.

³⁰ Me Lekritir ki dir? Li dir, “Ranvway fam esklav avek so zanfan, parski garson fam esklav pa pou gagn par dan leritaz garson fam lib.”

³¹ Alor mo bann frer ek ser, nou pa zanfan enn fam esklav me zanfan enn fam lib.