Ga 3 - Nouvo Testaman Kreol Morisien Harmonisation NTPS KM

Lalwa oubien lafwa

¹ Ayo, bann Galat, ala zot bet! Kisann-la finn zet enn sor lor zot? Pourtan, devan zot lizie, zot finn gagn enn prezantasion kler kouma Zezi Kris finn krisifie lor lakrwa.

² Enn sel zafer mo dimann zot: Eski zot finn resevwar Lespri parski zot pratik lalwa, oubien parski zot finn ekout mesaz lafwa?

³ Ki kantite bet zot bet? Zot koumans avek Lespri Bondie, eski aster-la zot anvi fini avek zot prop zefor imin?

⁴ Eski zot finn fer tou sa bann lexperyans-la pou nanye? Pa kapav tousala pou nanye.

⁵ Bondie, kan li donn zot so Lespri e fer bann mirak parmi zot, eski li fer sa akoz zot pratik lalwa oubien parski zot finn met zot lafwa dan seki zot finn tande?

⁶ Anou konsider Abraam. Li ti met tou so konfians dan Bondie, ek Bondie finn rekonet li kouma kikenn drwat akoz so lafwa.

⁷ Alor, zot bizin konpran ki bann ki viv dan lafwa, zotmem ki desandan Abraam.

⁸ Lekritir ti finn prevwar ki Bondie pou rann bann payin zis par zot lafwa. Lakoz samem li ti dir, “Tou pep lor later pou beni atraver twa.”

⁹ Pou sa rezon-la, tou dimounn ki krwar, zot pou beni avek Abraam ki ti krwar.

¹⁰ Dimounn ki depann lor lobeisans lalwa, li deza anba malediksion. Dan Lekritir finn dir: “Dimounn ki pa obzerv ek obeir tou seki finn ekrir dan lalwa pou modi.”

¹¹ Li kler ki personn pa kapav deklar limem zis devan Bondie par lalwa, parski finn ekrir: “Kikenn ki zis par lafwa, li pou viv.”

¹² Me lalwa pena nanye pou fer avek lafwa, parski finn ekrir: “Bann ki obeir lalwa pou viv par lalwa.”

¹³ Kris, ki ti vinn enn malediksion pou nou, finn peye pou delivre nou depi sa malediksion-la, parski finn ekrir: “Malediksion pou dimounn ki pandi ar pie.”

¹⁴ Sa finn arive pou ki par Zezi Kris, benediksion Abraam tom osi lor bann payin, e ki nou kapav resevwar promes Lespri dan lafwa.

Lalwa e promes Bondie

¹⁵ Mo bann frer, mo bann ser, mo pou donn zot enn lexanp ki tou dimounn servi: enn fwa ki enn testaman finn etabli, personn pa kapav kas li, oubien azout kiksoz ar li.

¹⁶ Bondie finn fer promes ar Abraam ek so desandan. Li pa finn dir, “Ek so bann desandan,” koumadir li pe koz lor boukou desandan; me li dir, “Ek to desandan,” setadir Lekris.

¹⁷ Ala seki mo anvi dir: Bondie finn etablir ek ratifie enn testaman; lalwa ki vinn anviger kat-san-trant-an apre sa, pa kapav anil lalians la ek siprim promes Bondie.

¹⁸ Si leritaz ki Bondie done, depann lor lalwa, li pa enn promes; me Bondie dan so lagras ti donn sa Abraam par enn promes.

¹⁹ Pou kifer lalwa alor? Lalwa finn azoute pou fer kone ki pese ete. Rol lalwa reste ziska larive sa desandan pou ki sa promes-la finn fer. Bann anz finn amenn lalwa par enn mediater.

²⁰ Enn mediater pa neseser si zis enn dimounn ki konserne, me Bondie li enn sel.

Rol Lalwa

²¹ Eski lalwa li kont promes Bondie? Pa ditou! Parski si donn enn lalwa ki ena pouvwar donn lavi, alor bien sir kapav vinn zis devan lizie Bondie par lalwa.

²² Me Lekritir deklare ki lemond antie prizonie pouvwar pese, pou ki promes Bondie li realize pou bann krwayan akoz zot lafwa dan Zezi Kris.

²³ Avan ki lafwa arive, lalwa ti anferm nou kouma prizonie ziska ki lafwa revel limem.

²⁴ Alors lalwa ti nou gardien ziska Lekris vini, pou ki nou vinn zis par lafwa devan Bondie.

²⁵ Aster ki dimounn krwar, nou nepli bizin enn gardien.

²⁶ Zot tou bann zanfan Bondie par lafwa dan Zezi Kris.

²⁷ Zot tou finn batize dan Kris e zot finn abiy zot avek Kris parey kouma zot met enn linz nef.

²⁸ Li pa fer okenn diferans ki to enn Zwif ou enn Grek, esklav ou lib, zom ou fam, parski nou tou enn sel dan Zezi Kris.

²⁹ E si zot pou Kris, alor zot enn desandan Abraam, zot bann eritie dapre promes Bondie.