Ga 2 - Nouvo Testaman Kreol Morisien Harmonisation NTPS KM

Pol ek lezot disip

¹ Katorz-an apre, mo ti mont Zerizalem avek Barnabas, mo ti amenn Tit osi avek mwa.

² Mo finn monte apre enn revelasion ki mo finn gagne. Mo finn prezant bann-la Bonn Nouvel ki mo anonse parmi bann non-Zwif. Mo ti fer sa dan enn renion prive ar bann dirizan pli inportan. Mo pa ti anvi ki travay ki mo finn fer, ek seki mo pe fer aster-la, zot initil e pa servi nanye.

³ Tit ti avek mwa. Mem si li enn Grek, zot pa ti fors li pou fer sirkonsizion,

⁴ malgre ki enn bann fos frer ti glis anba-anba pou espionn liberte ki nou ena dan Zezi Kris e pou anprizonn nou dan lalwa.

⁵ Nou pa finn soumet nou ditou ar bann-la, pou ki nou prezerv laverite Bonn Nouvel pou zot, nou frer ek ser.

⁶ Me pou seki konsern dimounn ki paret bann gran dirizan, seki zot ete pa fer okenn diferans pou mwa, Bondie pa ziz dapre laparans, sa bann dimounn-la pa finn inpoz nanye nouvo ar Bonn Nouvel ki mo anonse.

⁷ Okontrer, zot ti trouve ki Bondie finn konfie mwa Bonn Nouvel pou anons bann non-Zwif parey kouma Pier pou bann Zwif.

⁸ Bondie, par so pwisans inn fer mwa enn zapot pou bann payin, parey kouma Pier ti avoye kot bann Zwif.

⁹ Letan Zak, Pier ek Zan, bann gran pilie legliz, rekonet lagras ki Bondie finn donn mwa, zot ser nou lame, Barnabas ek momem, kouma enn sign lakorite. Nou tom dakor ki nou al kot bann non-Zwif e zot kot bann Zwif.

¹⁰ Zot ti dimann nou enn sel kiksoz, ki nou mazinn bann pov; e sa mo ti touletan vremem anvi fer.

Diskision ant Pol ek Pier

¹¹ Me ler Pier retourn Antios, mo ti opoz li an piblik parski li ti dan lerer.

¹² Ofet avan ki Zak ti avoy sertin dimounn, Pier ti pe manz avek bann payin; me ler bann-la vini, li retir li, li ti per bann ki partizan sirkonsizion.

¹³ Bann lezot Zwif rant dan so zwe ipokrit, e Barnabas limem ti antrene dan sa doub zwe-la.

¹⁴ Me kan mo ti remarke ki zot pa pe konport zot dapre Bonn Nouvel, mo dir Pier devan zot tou, “Si twa, enn Zwif, to viv kouma enn payin e pa kouma enn Zwif, kouma to kapav fors bann payin pou viv kouma Zwif?”

Sove par lafwa

¹⁵ Nou, nou bann Zwif par nesans e alor nou lorizinn li pa sorti kot lot nasion, bann swadizan peser.

¹⁶ Pourtan nou kone ki enn dimounn pa zistifie par pratik lalwa me par so lafwa dan Zezi Kris. Nou osi, nou finn krwar dan Zezi Kris, pou ki nou zistifie par Zezi Kris, e pa par pratik lalwa, parski personn pa zistifie parski li pratik lalwa.

¹⁷ Me si dan nou zefor pou rod zistifikasion par Kris, nou retrouv noumem peser, eski savedir ki Kris pe servi lakoz nou pese? Biensir ki non!

¹⁸ Me si mo rebatir seki mo finn detrir momem, savedir mo rann momem enn transgreser.

¹⁹ Dapre seki konsern lalwa, mo deza enn mor, enn lamor provoke par mem lalwa, pou ki mo kapav viv pou Bondie. Mo finn krisifie lor lakrwa avek Kris;

²⁰ alor, li nepli mwa ki pe viv, me Kris ki pe viv dan mwa. Lavi ki mo pe viv aster-la kouma enn imin, mo viv li par lafwa dan Garson Bondie, ki kontan mwa e finn donn so lavi pou mwa.

²¹ Mo pa pe rann lagras Bondie initil; me si par lalwa ki nou rann nou zis devan Bondie, savedir ki Kris finn mor pou nanye.