Ef 6 - Nouvo Testaman Kreol Morisien Harmonisation NTPS KM

Zanfan ek Paran

¹ Bann zanfan zot bizin obeir zot paran dan Lesegner, parski sa li bon.

² “Ena respe pou to papa ek to mama.” Sa premie komannman ki ena enn promes atase ar li:

³ “Pou ki to ena boner e enn long lavi lor later.”

⁴ Bann paran, pa fer zot zanfan revolte, me bizin elve zot dan disiplinn ek lansegnman Lesegner.

Esklav ek Met

⁵ Bann esklav bizin obeir zot met lor later ar lakrint e tranbleman; fer sa avek enn leker sinser, koumadir zot pe servi Lekris.

⁶ Pa fer sa zis kan bann-la pe vey zot, pou fer bann-la plezir; me fer volonte Bondie ar tou zot leker kouma bann esklav Lekris.

⁷ Fer zot travay avek bonn volonte, koumadir zot pe servi Lesegner e non bann imin,

⁸ parski zot kone ki Lesegner li pou rekonpans ninport kisann-la pou so bon travay ki li finn fer, ki li esklav ou lib.

⁹ Zot, bann met, tret zot bann esklav dan mem fason. Pa menas zot. Rapel ki zot toule-de, ki li met ki li esklav, zot ena mem Met dan lesiel, e li ziz tou dimounn san okenn preferans.

Bann zarm ki Bondie done

¹⁰ Pou termine, fortifie zot dan Lesegner ek dan lafors so pwisans.

¹¹ Met tou lekipman solda ki Bondie fourni; met li lor zot pou ki zot kapav reziste kont manigans diab.

¹² Nou pa pe lit kont pwisans imin me kont bann dirizan, bann lotorite, bann pouvwar ki dominn sa lemond teneb la, kont pwisans spiritiel lemal lao dan lesiel.

¹³ Alor met tou larmir Bondie aster, koumsa kan move zour arive zot va reziste latak lennmi, e letan zot finn konbat ziska lafin, zot pou ankor pe tini dibout.

¹⁴ Pare zot! Met sintir laverite otour zot lerin, e ladrwatir kouma enn zile proteksion;

¹⁵ dan zot lipie, met soulie ki fer zot pare pou zot al anons Bonn Nouvel ki donn lape.

¹⁶ Sarye lafwa touletan kouma enn boukliye, ar sa ki zot pou tengn tou fles anflame ki diab avoye.

¹⁷ Aksepte elmet ki sov zot, e Parol Bondie kouma lepe ki Lespri done.

¹⁸ Priye touzour dan pwisans Lespri ar tou kalite lapriyer e siplikasion dan tou sirkonstans; res lor zot gard, res fidel. Priye pou lepep Bondie.

¹⁹ Priye pou mwa osi, pou ki mo gagn fasilite laparol, pou ki mo koz ar lasirans pou revel mister Bonn Nouvel.

²⁰ Pou sa Bonn Nouvel-la mo enn anbasader ki dan prizon. Priye pou ki mo gagn lodas pou koze kouma bizin.

Bann dernie salitasion

²¹ Tisik, frer ki nou bien kontan e ki fidel dan travay Lesegner, pou donn zot nouvel lor mwa, pou ki zot kone ki pe pase.

²² Samem rezon mo pe avoy li, pou donn zot nouvel lor nou, e resof zot leker.

²³ Ki Bondie Papa ek Lesegner Zezi Kris akord lape ek lamour, ar lafwa, tou bann frer, tou bann ser.

²⁴ Ki lagras Bondie li res ar tou seki ena lamour eternel pou Lesegner Zezi Kris.