Ef 4 - Nouvo Testaman Kreol Morisien Harmonisation NTPS KM

Linite Lekor

¹ Mwa ki prizonie parski mo servi Lesegner, mo sipliy zot viv enn lavi ki dign sa lapel ki zot finn gagne la,

² ar limilite, douser ek pasians. Ki zot soutenir zot kamarad avek amour.

³ Fer zefor pou gard linite Lespri par lape ki tini zot ansam.

⁴ Ena enn sel lekor, enn sel Lespri, e Bondie ti apel zot pou enn sel lesperans.

⁵ Ena enn sel Segner, enn sel lafwa, enn sel batem;

⁶ enn sel Bondie, Papa tou dimounn, li Segner lor tou, li azir dan tou, li abit dan tou.

⁷ Selman, sakenn parmi nou finn gagn lagras dapre zenerozite Lekris.

⁸ Kouma Lekritir deklare: “Li ti mont dan oter, li ti amenn bann prizonie ar li, li ti fer don bann dimounn.”

⁹ Aster, ki savedir “Li ti mont dan oter”? Savedir ki li ti finn osi desann dan bann profonder later.

¹⁰ Alor sa dimounn ki finn desann la, limem dimounn ki finn mont pli ot ki tou lesiel ki ena, pou li ranpli liniver.

¹¹ Limem ki finn fer don; ena li finn fer zapot, lezot profet, evanzelis, paster ek ansegnan,

¹² pou ki bann krwayan ena kapasite akonplir zot minister, pou grandi lekor Lekris.

¹³ Koumsa nou ariv ansam dan linite nou lafwa, dan nou konesans Garson Bondie; nou devlope pou vinn bann krwayan adilt ziska nivo grander Lekris.

¹⁴ Lerla nou pa pou kouma bann zanfan, ki balote, ki sakouye dan siklonn tou kalite doktrinn ki bann dimounn rize servi pou antrenn lezot dan lerer.

¹⁵ Okontrer, nou bizin koz laverite dan lamour pou ki dan tou domenn nou grandi dan Lekris, limem ki latet.

¹⁶ Par li bann diferan parti lekor vinn ansam; lekor antie tini ansam par bann zwintir; alors koumsa mem li grandi e li devlope dan lamour.

Nouvo lavi bann Krwayan

¹⁷ Dan nom Lesegner, mo averti zot: zot bizin aret viv kouma bann non-krwayan viv; bann-la zot panse pena okenn valer,

¹⁸ zot lespri dan teneb; bann-la napa viv lavi ki Bondie oule parski zot ranpli ar liniorans ki sorti depi zot leker ros.

¹⁹ Zot finn perdi tou santiman laont; zot viv enn lavi debos e zot ena enn dezir pou fer tou kalite inpirte.

²⁰ Pa koumsa ki zot ti aprann konn Lekris!

²¹ Sirman antan ki Krwayan zot finn tann koz li, e zot finn gagn lansegnman lor laverite dan Zezi.

²² Alor zot bizin abandonn zot ansien natir, manier zot ti pe viv avan e ki pouri par bann fos dezir.

²³ Fode ki zot leker ek zot lespri renouvle konpletman.

²⁴ Abiy zot avek enn nouvo natir, ki kree dapre resanblans Bondie dan vre lazistis e lapirte.

²⁵ Rezet mansonz. Koz laverite ar zot prosin, parski nou tou manb enn sel lekor.

²⁶ Si zot ankoler, pa fer pese. Pa les zot koler res ziska ki soley al kouse.

²⁷ Pa donn diab okenn sans may zot.

²⁸ Voler bizin aret kokin; okontrer li bizin fer travay onet ar so prop lame pou ki li kapav ena seki bizin pou partaz ar bann pov.

²⁹ Napa koz move koze, me servi bann parol ki fortifie e ki donn seki neseser pou dibien bann dimounn ki tann zot.

³⁰ Pa fer Lespri Sin Bondie vinn tris, parski Lespri enn stanp ki Bondie finn met lor zot pou montre ki limem proprieter; sa enn garanti ziska sa Zour kot Bondie pou delivre zot.

³¹ Met dekote tou zot lamertim, zot koler, zot laraz, zot insilt, zot mesanste; tousala bizin disparet.

³² Zot bizin ena bonte ek boukou lafeksion pou lezot; pardonn zot prosin kouma Bondie finn pardonn zot par Lekris.