Ef 2 - Nouvo Testaman Kreol Morisien Harmonisation NTPS KM

Nouvo lavi avek Lekris

¹ E zot, zot ti spiritielman mor akoz zot fot ek zot pese.

² Lontan zot ti pe viv sa lavi-la; sa lepok-la zot ti pe swiv bondie sa lemond-la, sa prins ki ant lesiel ek later, sa lespri ki pe azir aster parmi bann ki opoz Bondie.

³ Nou osi, nou tou ti parmi sa bann-la, nou ti pe viv dapre bann dezir natir pese, nou ti pe fer volonte nou natir e swiv so bann inpilsion. Nou ti merit gagn koler Bondie kouma lezot.

⁴ Me akoz Bondie ena boukou-boukou konpasion, e li ena enn gran lamour pou nou,

⁵ letan nou ti spiritielman mor akoz nou bann fot, li ti donn nou lavi avek Lekris. Par lagras Bondie ki nou sove.

⁶ Li finn resisit nou avek Lekris pou fer nou regne avek li lao dan lesiel.

⁷ Par sa, Bondie anvi montre pou bann siek ki pe vini, rises so lagras, exprime par so bonte pou nou dan Zezi Kris.

⁸ Par lagras ki zot sove, par mwayin lafwa; zot, zot pa finn fer nanye, sa enn kado Bondie sa.

⁹ Li pa vinn atraver aksion imin, koumsa personn pa kapav fer fanor.

¹⁰ Nou, nou louvraz Bondie, li finn fasonn nou, li finn kree nou dan Zezi Kris pou ki nou realiz bann bon aksion ki Bondie finn prepare davans.

Nou enn sel dan Zezi Kris

¹¹ Rapel seki zot ti ete lontan. Zot non-Zwif par nesans. Bann ki ti konsider zotmem bann “sirkonsi”, par enn loperasion lor zot lekor, ti apel zot bann non-Zwif, bann ki “pa sirkonsi.”

¹² Rapel ki sa lepok-la zot ti separe ar Lekris, zot ti andeor lepep Bondie, zot ti bann etranze. Zot pa ti ena okenn par dan bann lalians fonde lor promes Bondie. Zot ti san lesperans e san Bondie dan lemond.

¹³ Me aster dan linion avek Zezi Kris, zot ki lontan ti lwin, finn koste zot pre par disan Lekris.

¹⁴ Lekris, limem nou lape. Dan so laser li fer de pep ki divize vinn enn sel. Li finn kraz miray ostilite ki separ bann lennmi.

¹⁵ Li finn aboli lalwa, ek so komannman ek so bann regleman. Li ti oule apartir Zwif ek non-Zwif kree enn nouvo pep dan linion avek li, ek etablir lape.

¹⁶ Par mwayin lakrwa li ti rekonsilie toule-de dan enn sel lekor avek Bondie. Par lakrwa li ti touy laenn.

¹⁷ Lekris finn vinn anons lape ar zot ki ti lwin ek ar bann ki pre.

¹⁸ Par Lekris nou tou, Zwif ek non-Zwif, nou kapav prezant nou devan Bondie Papa dan enn sel Lespri.

¹⁹ Ala ki manier zot nepli etranze, ni imigre, me zot sitwayen ansam ar bann krwayan e manb lafami Bondie.

²⁰ Zot finn integre dan konstriksion ki ena bann Zapot ek bann profet pou fondasion, ek Zezi Kris limem ros ki tini tou.

²¹ Limem ki solidite sa konstriksion-la an-antie; sak bout marye ansam pou mont enn Tanp ki konsakre pou Lesegner.

²² Dan linion avek li, zot osi zot fer parti ansam avek lezot pou vinn enn lakaz kot Bondie abite par so Lespri.