Ef 1 - Nouvo Testaman Kreol Morisien Harmonisation NTPS KM

Salitasion

¹ Mwa Pol, enn zapot Zezi Kris par volonte Bondie, mo pe ekrir bann krwayan e bann fidel dan Zezi Kris.

² Ki Bondie nou Papa e Lesegner Zezi Kris donn zot lagras ek lape.

Benediksion ki Bondie donn nou par Lekris

³ Anou beni Bondie ki Papa nou Segner Zezi Kris. Dan nou linion avek Zezi Kris, Bondie finn beni nou ar tou kalite benediksion spiritiel lao dan lesiel.

⁴ Avan mem fondasion lemond li ti finn swazir nou pou limem par Lekris pou ki nou vinn sin ek san repros devan li.

⁵ Dan lamour li finn predestinn nou pou vinn so bann zanfan adoptif par Zezi Kris, dapre so volonte ek so plezir.

⁶ Anou loue Bondie pou so laglwar ek so lagras ki li finn donn nou dan so Bieneme.

⁷ Dan Lekris, nou finn gagn delivrans par so disan, dan Lekris nou bann fot finn pardone dapre rises so lagras.

⁸ Bondie finn partaz so lagras an abondans ar nou e li finn ouver nou lespri e nou lintelizans.

⁹ Li finn fer nou konn mister so volonte, so plan ki li ti finn deside davans dapre so bon plezir pou realize par Lekris.

¹⁰ Sa plan-la, ki Bondie pou termine dan lafin letan, li enn plan pou reinir tou seki dan lesiel ek lor later anba enn sel sef, Lekris.

¹¹ Dan nou linion ar li, nou finn resevwar enn leritaz ki ti promet nou, parski Bondie ti finn swazir nou davans, dapre so plan,

¹² pou nou loue so grander, nou ki ti bann premie pou met nou lesperans dan Lekris.

¹³ Zot finn tann parol laverite, Bonn Nouvel ki sov zot; zot finn krwar dan Lekris, alor Bondie finn mark zot ar stanp Lespri Sin ki li ti promet.

¹⁴ Lespri Sin, li enn lavans lor leritaz ki Bondie rezerve pou so pep. Sa donn nou lasirans ki Bondie pou akord nou delivrans final. Anou donn li laglwar!

Lapriyer Pol

¹⁵ Depi ki mo finn aprann zot lafwa dan nou Segner Zezi Kris e zot lamour pou tou bann krwayan,

¹⁶ mo pa kapav aret rann gras pou zot, e mo mansionn zot dan mo lapriyer.

¹⁷ Mo priye Bondie Papa nou Segner Zezi Kris, Papa ki ena laglwar, ki li donn zot Lespri lasazes, e Lespri ki devwal Bondie pou ki zot konn li plis ankor.

¹⁸ Mo priye ki li ouver zot leker ver so lalimier pou zot kone dan ki lesperans li pe apel zot, ki rises e ki mervey ena dan so leritaz ki li pe donn zot parmi pep Bondie,

¹⁹ ki pwisans imans li ena dan nou faver, nou ki bann krwayan. Sa lafors tou pwisan lamem

²⁰ ki li finn met an aksion dan Lekris kan li ti resisit li parmi bann mor e li ti fer li asiz lor so drwat, lao dan lesiel.

²¹ Lekris bien lao lor tou lotorite, pouvwar, pwisans ek rwayote. Tit ki li ena pli gran tit ki kapav nome, pa selman dan lemond aster me ankor dan lemond ki pe vini.

²² Bondie finn met tou anba so lipie e li finn plas li lao tou, kouma latet Legliz

²³ ki so lekor; dan Legliz ki Lekris prezan antierman, e limem, li ranpli tou antierman.