Eb 9 - Nouvo Testaman Kreol Morisien Harmonisation NTPS KM

Adorasion lor later ek dan lesiel

¹ Aster-la, mem dan premie lalians, ti ena bann rit konsernan ladorasion ek sanktier ki ti lor later.

² Ti mont enn doub latant. Dan so premie parti kot ena sandelie, enn latab avek dipin sakre, ti apel li landrwa sin.

³ Deryer deziem rido, ena sa lot parti ki apel “Pli sin ki sin”.

⁴ Ti ena laba enn lotel an-or kot bril lansan. Ena la osi enn kof lalians an-or. Dan kof-la ti ena enn ti vaz an-or ki kontenir lamann ek baton Aaron ki ti finn fleri ek bann komannman lalians grave lor ros.

⁵ Par lao li, ti ena bann Seribin ki avek zot lonbraz ti kouver landrwa kot ti ofer disan pou pardonn pese. Me ler pankor arive pou koz tousala an detay.

⁶ Kan tou kitsoz finn pare koumsa, bann pret rant regilierman dan sa premie parti-la pou fer zot servis.

⁷ Me dan deziem parti, selman gran pret ki ti rant laba enn fwa par an. Li bizin amenn avek li disan ki li ofer pou limem ek pou bann fot ki lepep finn komet involonterman.

⁸ Par sa, Lespri Sin pe montre ki sime ki amenn dan sanktier pa ankor ouver, osi lontan ki premie latant ankor la.

⁹ Sa enn sinbol pou letan aster, pou montre ki sakrifis ki pe ofer pa pirifie dimounn ki pe ofer li.

¹⁰ Me li konsern selman manze, bwar ek diferan seremoni pirifikasion, enn bann rit imin ki finn inpoze ziska ki tou pou sanze pou touletan.

¹¹ Me kan Kris, gran pret tou bann dibien fitir finn vini, li finn travers enn latant pli gran e pli parfe, ki pa finn fabrike par lame imin, setadir ki pa fer parti sa kreasion-la.

¹² Li finn rant enn fwa pou tou dan sanktier, non pa avek disan bouk oubien toro, me avek so prop disan. Koumsa mem li finn delivre nou pou touletan.

¹³ Avredir si nou fann disan bouk ek toro, oubien lasann enn zenis lor dimounn pou pirifie zot,

¹⁴ aster-la, ki kantite disan Kris pli efikas! Par Lespri eternel, li finn ofer limem ar Bondie kouma enn sakrifis parfe, pou pirifie nou konsians; nou pena pou fer bann rit initil, me nou kapav servi Bondie vivan.

¹⁵ Ala kifer li mediater enn nouvo lalians, pou ki bann ki finn apele kapav resevwar leritaz eternel ki finn promet, parski finn ena enn lamor ki finn vinn efas fot ki zot finn komet anba ansien lalians.

¹⁶ La kot ena enn testaman, li neseser prouv lamor sa dimounn ki finn fer sa testaman-la.

¹⁷ Ofet enn testaman pena okenn lefe osi lontan ki dimounn konserne la ankor vivan. Li valid selman apre so lamor.

¹⁸ Akoz samem premie lalians pa finn rant anviger san ki disan verse.

¹⁹ Apre ki Moiz ti prezant lepep tou bann komannman dapre lalwa, li ti pran disan ti toro ek bouk, avek delo e li ti servi enn fey lizop ek enn bout lalenn rouz pou fann sa lor liv lalwa ek lor tou dimounn.

²⁰ Li dir, “Samem disan lalians ki Bondie finn komann zot pou respekte”.

²¹ E dan mem fason avek sa disan-la, li ti aroz latant ek tou bann resipian ki servi pou lapriyer.

²² Dapre lalwa preske tou kitsoz bizin pirifie avek disan e bann pese pa pou pardone si disan pa verse.

Sakrifis Kris efas pese

²³ Si bann model kitsoz dan lesiel bizin pirifie par sa bann rit-la, alor bann realite lesiel merit meyer sakrifis ki sa.

²⁴ Kris pa finn rant dan enn sanktier ki finn konstrir par bann imin, ki nek enn kopi, me li finn rant dan lesiel mem, pou ki aster-la mem li prezant li devan Bondie dan nou faver.

²⁵ Kris pena pou ofer li plizir fwa parey kouma gran pret ki rant dan sanktier lane apre lane avek disan ki pa pou li;

²⁶ sinon li ti pou bizin soufer ankor ek ankor depi fondasion lemond. Me la kouma li ete, li finn paret enn fwa pourtou ziska lafin pou efas pese par sakrifis so prop lekor.

²⁷ Parey kouma tou dimounn pou bizin mor enn sel fwa, apre sa Bondie pou ziz zot.

²⁸ Alor Kris, ki finn ofer limem enn sel fwa pou efas pese enn kantite dimounn, li pou paret enn deziem fwa, pa pou efas pese, me pou sov bann ki pe vremem atann so retour.