Eb 8 - Nouvo Testaman Kreol Morisien Harmonisation NTPS KM

Zezi nou gran pret

¹ Ala pwin ki nou ti anvi dir: nou ena enn gran pret ki pe asiz lor kote drwat tronn samazeste Bondie dan lesiel,

² ki exers so minister dan vre sanktier, vre latant drese par Lesegner e pa par bann imin.

³ Sak gran pret finn etabli pou ofer don ek sakrifis; alor fode ki sa pret-la osi ena kitsoz pou ofer.

⁴ Aster-la, si Kris ti lor later, li pa ti pou ditou pret, parski ena deza enn bann pret ki ofer don dapre lalwa.

⁵ Seki sa bann pret-la fer, li zis enn kopi seki pe pase dan lesiel. Li resanble seki ti arive avek Moiz letan li ti pe rod konstrir latant. Bondie ti dir li, “Tansion! Fer tou dapre model ki ti montre twa lor montagn.”

⁶ Me, avredir Lekris finn resevwar enn minister ankor pli siperyer, parski dan sa pozision-la, limem mediater enn meyer lalians, baze lor bann meyer promes.

⁷ Si premie lalians ti san repros, pa ti pou ena okenn nesesite pou ranplas li par enn lot.

⁸ Bondie ti repros lepep kan li ti dir: “Zour pe aprose kot mo pou fer enn nouvo lalians avek pep Izrael ek pep Zida.

⁹ Li pa pou parey kouma lalians ki mo ti fer avek zot bann anset zour mo ti pran zot par lame pou fer zot sorti depi pei Lezip. Zot pa ti fidel ar lalians ki mo ti fer ar zot. Lesegner ti azoute: ‘Alor mo nepli trakas mwa ar zot.’

¹⁰ Ala lalians ki mo pou fer aster-la avek Izrael. Apre sa bann zour-la, Lesegner dir: Mo pou met mo bann lalwa dan zot panse, mo pou ekrir bann lalwa-la dan zot leker. Momem zot Bondie, e zot, zot pou vinn mo pep.

¹¹ E zot pa pou bizin ansegn zot kamarad, ni dir ant zot ki zot bizin konn Lesegner. Parski tou dimounn pou konn mwa, depi so pli tipti ziska so pli gran.

¹² Mo pou pardonn zot pese, e mo pou nepli mazinn ankor zot pese.”

¹³ Letan li pe koz enn nouvo lalians, li ti pe fer sa premie lalians-la vinn ansien. E seki ansien e pe vinn vie pou disparet.