Eb 4 - Nouvo Testaman Kreol Morisien Harmonisation NTPS KM

Repo ki Bondie promet

¹ Pandan ki promes pou rant dan repo Bondie touzour valab, anou pran kont pou ki personn parmi zot pa perdi sa lokazion pou rant ladan la.

² Bonn Nouvel finn vinn kot nou parey kouma kot bann-la ki ti dan dezer. Me mesaz ki zot finn tande pa finn profit zot, parski zot pa finn aksepte mesaz-la avek lafwa.

³ Nou ki finn krwar, nou finn resevwar sa repo ki Bondie ti promet la, ler li ti dir; “Dan mo koler mo ti fer serman, zame zot pa pou rant dan mo repo.” Li ti dir sa, mem si so travay ti finn konplete depi kreasion lemond.

⁴ Parski konsernan setiem zour, dan Lekritir finn dir, “Bondie ti repoze setiem zour apre tou so travay.”

⁵ Lor sa zafer-la, finn osi dir, “Zame zot pa pou rant dan mo repo.”

⁶ Promes pou rant dan repo li touzour valab, e bann ki finn resevwar sa promes-la an-premie, pa finn reisi parski zot pa finn obeir.

⁷ Alor, Bondie finn met anplas enn lot zour ki apel “zordi”. Boukou lane apre, li ti dir atraver David: “Zordi kan zot tann so lavwa pa ferm zot leker.”

⁸ Ofet si Zozwe ti finn kondir lepep dan sa repo-la, Bondie pa ti pou koz lor enn lot zour.

⁹ Alor ena enn repo ki parey kouma saba ki ankor rezerve pou pep Bondie;

¹⁰ parski dimounn ki rant dan repo Bondie, li osi pran repo dan so travay parey kouma Bondie osi finn fer.

¹¹ Anou fer tou zefor pou rant dan sa repo-la pou ki personn ant nou pa tonbe akoz dezobeisans parey kouma nou anset ti fer.

¹² Avredir, Parol Bondie li vivan e li ena lefe. Li pli fite ki enn lepe koup de kote. Kan li perse, li al dan fon, mem ziska kot nou nam separe ar nou lespri; ziska nou zwentir ek lamwel. Li analiz seki ena dan panse ek leker imin.

¹³ Dan kreasion, nanye pa invizib pou lizie Bondie. Devan li nou touni, so lizie trouv tou e zis avek limem ki nou bizin rann kont.

Zezi gran pret

¹⁴ Parski nou ena enn gran pret, Zezi Garson Bondie, ki finn travers lesiel ziska dan prezans Bondie, anou tini ferm dan lafwa ki nou konfese.

¹⁵ Nou pena enn gran pret ki pa kapav sinpatiz ar nou dan nou febles, me nou ena enn ki finn konn tantasion dan toutsort fason, me ki pa finn fer pese.

¹⁶ Avek konfians, anou apros tronn Bondie pou resevwar so mizerikord ek so lagras pou ed nou kan nou bizin.