Eb 2 - Nouvo Testaman Kreol Morisien Harmonisation NTPS KM

Enn gran delivrans

¹ Akoz samem nou bizin res ferm avek seki nou finn tande, pou ki nou pa derape.

² Si mesaz ki bann anz ti amene lontan ti valid e tou dimounn ki pa ti respekte ek obeir mesaz-la, zot ti gagn pinision ki zot ti merite;

³ kouma nou pou sap nou lavi si nou negliz enn gran delivrans parey? Lesegner ti koz lor la an-premie, apre lezot ti prouv li par zot temwaniaz.

⁴ Bondie limem finn soutenir sa mesaz-la par bann sign extraordiner avek enn bann mirak e osi par bann don dapre volonte Lespri Sin.

Kris delivre nou

⁵ Ofet, sa lemond ki pe vini e ki nou pe koze la, Bondie pa finn plas li anba pouvwar bann anz.

⁶ Kikenn finn dir dan Lekritir: “Ki imin ete pou to mazinn li? ki imin ete pou to pran li kont?

⁷ Pou inpe letan, to finn rann li inferyer ki bann anz, to finn kouronn li avek boukou laglwar ek loner,

⁸ to finn donn li lotorite lor tou.” Si Bondie finn met tou anba lotorite imin, sa vedir ki li pa finn les nanye andeor zot lotorite. Me dan letan prezan, nou pa trouve ki tou kiksoz anba lotorite imin.

⁹ Me nou trouv Zezi, ki pou inpe letan finn met li pli ba ki bann anz. Nou trouv li kourone avek laglwar e loner parski li finn soufer lamor. Par lagras Bondie, li finn gout lamor pou tou dimounn.

¹⁰ Li normal ki Bondie ki finn kree ek prezerv tou kiksoz, fer Zezi vinn parfe atraver lasoufrans, pou ki boukou dimounn partisip dan so laglwar. Zezi, limem linisiater zot delivrans.

¹¹ Sa Enn ki sanktifie dimounn-la, ek sa bann ki resevwar sanktifikasion-la, toule-de zot sorti dan mem rasinn. Alor Zezi pa onte pou apel zot frer e ser.

¹² Li dir, “Mo pou proklam to nom ar mo bann frer, mo bann ser, omilie lasanble, mo pou loue twa.”

¹³ Li osi dir, “Mo pou met mo konfians dan Bondie.” E ankor, “Ala mo la avek bann zanfan ki Bondie finn donn mwa.”

¹⁴ Parski sa bann zanfan-la, zot ena enn natir imin ki fer avek laser ek disan. Zezi osi partaz sa mem natir-la. Li finn mor e atraver so lamor li finn detrir Satan ki ena pouvwar touy dimounn.

¹⁵ Li delivre tou bann ki ti pe pas tou zot lexistans dan lesklavaz, akoz zot per lamor.

¹⁶ Ofet li pa pe vinn osekour bann anz, me plito pou ed bann desandan Abraam.

¹⁷ Pou sa rezon-la, li bizin vinn parey kouma so bann frer e ser dan tou fason, pou li kapav vinn enn gran pret fidel ek ranpli ar mizerikord dan servis Bondie, e pou ki bann pese dimounn pardone.

¹⁸ Aster-la, parski li finn soufer ek finn konn tantasion, li kapav ed tou bann ki soufer tantasion.