Eb 10 - Nouvo Testaman Kreol Morisien Harmonisation NTPS KM

Sakrifis Lekris enn fwa pourtou

¹ Lalwa li nek enn lonbraz bann vre kitsoz ki pou vini apre e li pa enn reprezantasion exak sa bann kitsoz-la. Li pa kapav pirifie bann ki apros zot ar Bondie malgre ti pe ofer sakrifis lor sakrifis, lane apre lane.

² Sinon zot ti pou finn aret ofer sakrifis, parski dimounn ki finn pirifie enn fwa pourtou, pa ti pou ena move konsians.

³ An-realite, par sa bann sakrifis-la, dimounn rapel zot pese lane apre lane;

⁴ parski disan toro ek bouk pa pou zame kapav efas pese.

⁵ Akoz samem kan Kris ti vinn dan lemond, li ti dir, “To pa finn anvi sakrifis ek lofrand me to finn donn mwa lekor imin.

⁶ Sakrifis zanimo ek lofrand pou pardonn pese pa finn fer twa plezir

⁷ Alor mo finn dir, ‘To trouve Segner, mo finn vini momem pou fer to volonte parey kouma finn ekrir lor mwa dan liv sakre.’ ”

⁸ Premie dabor li ti dir, “Bann sakrifis, lofrand, sakrifis pou efas pese, li pa oule. Tousala pa fer li plezir.” Pourtan sa bann sakrifis-la ti ofer dapre lalwa.

⁹ Apre sa li ti azoute “Ala mo finn vini pou fer to volonte”. Li aboli premie sakrifis pou ranplas li par enn deziem.

¹⁰ Akoz Zezi Kris finn fer volonte Bondie, nou finn vinn sin atraver sakrifis lekor Zezi Kris enn fwa pourtou.

¹¹ Zour apre zour sak pret dibout pou ofer so sakrifis ankor ek ankor, pourtan zot zame kapav efas pese.

¹² Me kan Lekris finn ofer enn fwa pourtou sakrifis ki efas pese, “Li ti asiz dan kote drwat Bondie”

¹³ e li pe atann “Ziska seki Bondie fer so bann lennmi vinn so marspie.”

¹⁴ Par enn sel lofrand, li finn rann parfe tou dimounn ki li finn sanktifie.

¹⁵ E Lespri Sin osi konfirm sa avek nou, li dir;

¹⁶ “Samem lalians ki mo pou fer avek zot apre sa bann zour-la, Bondie deklare, Mo pou met mo bann lalwa dan zot leker, mo pou ekrir zot dan zot lespri.”

¹⁷ Li azoute: “Mo pou nepli rapel zot pese e bann dimal ki zot finn fer”.

¹⁸ La akot pese finn pardone, pa bizin okenn ofrand pou prezante pou efas pese-la.

Enn lapel perseverans

¹⁹ Mo bann frer ek ser, nou ena enn liberte aster-la pou rant dan sanktier par disan Zezi.

²⁰ Nou ena la enn nouvo sime vivan ki fer nou pas atraver vwal so prop lekor.

²¹ Nou ena enn gran pret ki diriz lakaz Bondie.

²² Anou apros nou kot Bondie avek enn leker sinser ek enn lafwa total, leker prop dan enn lekor lave avek dilo pir.

²³ Anou tini ferm lesperans ki nou proklame, parski Bondie gard touzour so promes.

²⁴ Anou panse kouma nou kapav ankouraz nou kamarad pou ena lamour ek pou fer dibien.

²⁵ Anou pa abandonn nou lasanble kouma de-trwa finn pran labitid; okontrer anou plis ankouraz nou kamarad parski kouma zot trouve zour Lesegner pe aprose.

²⁶ Si nou persiste dan pese apre ki nou finn konn laverite, pena okenn sakrifis ankor ki pou kapav efas pese;

²⁷ nek zis reste pou atann dan lafreyer zizman Bondie ek dife lanfer ki pou detrir tou dimounn ki kont Bondie.

²⁸ Dimounn ki dezobeir lalwa Moiz pou konn lamor san pitie si finn trouv li koupab par de ou trwa temwin.

²⁹ Ki pou ariv sa dimounn ki mepriz Garson Bondie, ki tret bonavini disan lalians Bondie ki finn pirifie li e ki insilte Lespri lagras? Zot kapav devine ki kantite sever so pinision pou ete!

³⁰ Nou konn bien kisann-la ti dir: “Mwa ki pou tir vanzans e mwa ki pou fer peye an-retour.” E li finn osi dir: “Lesegner pou ziz so pep.”

³¹ Li enn kitsoz terib pou tom dan lame Bondie vivan.

³² Me rapel seki zot finn viv dan lepase. Apre ki zot finn resevwar lalimier, zot finn soufer boukou, me zot finn res ferm dan lalit;

³³ parfwa dimounn finn insilte zot piblikman ek persekit zot, parfwa zot ti pre pou soutenir lezot ki pe gagn maltrete.

³⁴ Zot finn pran par dan soufrans bann prizonie. Dan lazwa, zot finn aksepte ki bann-la kokin tou zot dibien parski zot kone ki zot, zot posed kitsoz ankor pli meyer e ki pou reste pou touletan.

³⁵ Alor pa perdi kouraz. Pa perdi konfians dan zotmem. Sa pou donn zot enn gran rekonpans.

³⁶ Zot bizin landirans pou ki letan zot finn fer volonte Bondie, zot kapav resevwar seki li finn promet zot.

³⁷ Parey kouma Lekritir finn dir: “Zis inpe letan ankor Sa-Enn ki pou vini la pou arive, e li pa pou tarde.”

³⁸ Me dimounn ki pou krwar dan mwa pou viv par lafwa, me si li derape, mo pa pou satisfe ar li.

³⁹ Nou, nou pa bann dimounn ki retourn an-aryer pou ki apre pou perdi. Okontrer nou ena lafwa e nou lor sime delivrans.