Eb 1 - Nouvo Testaman Kreol Morisien Harmonisation NTPS KM

Bondie koz atraver so Garson

¹ Dan lepase, Bondie ti koz boukou fwa ar nou bann anset atraver bann profet, dan diferan manier ek diferan fason.

² Me dan dernie tan ki lor nou, li finn koz ar nou atraver so Garson. Samem Garson ki li finn swazir kouma eritie tou kiksoz. Atraver li, Bondie finn kree lemond.

³ Li reflet laglwar Bondie e li reprezant exakteman natir Bondie ki siport liniver par pwisans so parol. Apre ki li finn pirifie pese tou bann imin, li finn asiz dan kote drwat Bondie ki nou sel gran Segner dan lesiel.

Garson Bondie pli siperyer ki bann anz

⁴ Alor li finn vinn pli siperyer ki bann anz parski nom ki li finn resevwar, li depas tou lezot nom.

⁵ Ofet, avek ki anz Bondie finn deza dir, “Tomem mo Garson; zordi mo finn vinn to Papa”? Oubien, ar ki anz li finn dir, “Mo pou vinn enn Papa pou li, e li pou vinn enn Garson pou mwa”?

⁶ Me letan Bondie avoy so Garson premie-ne dan lemond, li ti dir, “Ki tou bann anz Bondie ador li.”

⁷ E letan Bondie koz lor bann anz-la, li dir, “Li servi bann anz kouma divan e so bann serviter kouma laflam dife.”

⁸ Me lor so Garson, Bondie finn dir, “Bondie, to tronn li pou res pou touzour. Dan lazistis to pou gouvern to rwayom.

⁹ To kontan seki drwat e to deteste seki move. Akoz samem Bondie, to Bondie, finn konsakre twa; avek enn delwil sin li finn donn twa lonksion; li finn rann twa pli zwaye ki to bann kamarad.”

¹⁰ Lekritir dir osi: “Tomem, Segner, ki dan koumansman finn kree later, ek lesiel, li louvraz to lame.

¹¹ Tou pou disparet, me twa to pou reste; lesiel ek later pou vinn vie kouma linz vinn vie;

¹² To pou roul zot kouma enn manto, e zot pou sanze kouma linz. Me twa, to pou touzour parey e to pou viv pou touzour.”

¹³ Avek ki anz Bondie finn deza dir: “Vinn asiz dan mo kote drwat, mo pou fer to bann lennmi vinn to marspie”?

¹⁴ Bann anz, eski zot pa zis bann lespri ki Bondie avoye pou servi tou seki pou sove?