3 Zn 1 - Nouvo Testaman Kreol Morisien Harmonisation NTPS KM

Salitasion

¹ Mwa Ansien, mo pe ekrir Gayis ki mo vremem kontan.

² Kamarad, mo swete ki tou pas bien pou twa e ki lasante to lekor li osi bon ki lasante to lespri.

³ Mo ti bien kontan kan enn bann frer ti vini. Zot ti fer eloz to fidelite e kouma to pe mars dan laverite.

⁴ Pena nanye ki fer mwa plis plezir kan mo tann dir kouma mo bann zanfan pe mars dan laverite.

Fidelite Gayis

⁵ Kamarad, tou seki to fer pou to bann frer ek ser mem si zot bann etranze, demontre to lafwa.

⁶ Zot finn donn temwaniaz lor to lamour dan legliz. To pou bien azir, si to ed zot dan zot vwayaz dan enn fason ki fer plezir Bondie.

⁷ Sa vwayaz-la, zot finn fer li pou laglwar Zezi Kris. Zot pa finn gagn okenn led avek bann non-krwayan.

⁸ Se pou sa, ki nou bizin soutenir bann dimounn koumsa, pou ki nou kapav vinn bann kolaborater dan laverite.

Diotref ek Demetreyis

⁹ Mo finn ekrir enn ti let Legliz; me Diotref, ki kontan touzour met li an-avan, pa finn aksepte nou lotorite.

¹⁰ Ler mo pou vini, mo pou denons so bann fos akizasion e so bann move manier; bann palab ki li pe fer lor nou. Li finn mem refiz akeyir bann frer e bann ser, li finn anpes bann lezot ki ti anvi akeyir zot e met zot deor dan legliz.

¹¹ Kamarad, pa bizin imit seki mal me imit seki bien. Dimounn ki fer dibien li avek Bondie; dimounn ki fer lemal li pa konn Bondie.

¹² Tou dimounn ti koz bon koze lor Demetreyis. Laverite osi ti rann temwaniaz dan so faver. Nou osi, nou temwagn dan so faver, e to kone ki sa temwaniaz-la li vre.

Salitasion final

¹³ Mo ena boukou kiksoz ankor pou ekrir twa, me mo prefer pa fer li avek plim ek lank.

¹⁴ Mo espere trouv twa biento e nou ava koze fasafas.

¹⁵ Ki lape res avek twa. Bann kamarad fer twa konpliman. Fer salam bann kamarad laba enn par enn.