2 Zn 1 - Nouvo Testaman Kreol Morisien Harmonisation NTPS KM

Salitasion

¹ Mwa, Ansien, mo pe ekrir sa Madam ki Bondie finn swazire ek so bann zanfan, ki vremem mo kontan. Pa mo tousel ki kontan zot, me tou bann dimounn ki konn laverite,

² parski laverite res dan nou e pou res avek nou pou touletan.

³ Ki Bondie Papa, ek Zezi Kris, so Garson, akord nou lagras, lamizerikord ek lape dan laverite ek lamour.

Laverite ek lamour

⁴ Sa finn fer mwa enn gran lazwa pou trouv inpe parmi to bann zanfan pe mars dan laverite parey kouma Bondie Papa inn komann nou.

⁵ Aster-la Madam, mo pa pe ekrir twa enn nouvo komannman, me samem komannman ki nou finn gagne depi koumansman. Mo dimann twa ki: “Sakenn kontan so kamarad.”

⁶ Lamour vedir ki nou mars dapre komannman Bondie. Komannman ki zot finn tande depi koumansman: mars dapre sime lamour.

⁷ Boukou manter finn vinn dan lemond, bann ki pa aksepte ki Zezi Kris finn vinn imin; sa bann dimounn-la, zot enn bann manter, zot antikris.

⁸ Zot bizin fer atansion pou zot pa perdi fri zot travay, me ki zot resevwar zot rekonpans plin-plin.

⁹ Tou dimounn ki depas limit e pa gard lansegnman Kris, zot pena Bondie dan zot. Dimounn ki gard so lansegnman, zot ini avek Bondie Papa ek so Garson.

¹⁰ Si kikenn vinn kot zot e li pa amenn sa lansegnman-la, pa bizin zot akeyir li, ni resevwar li.

¹¹ Seki akeyir enn dimounn koumsa, li pe partisip dan so bann move aksion.

Enn dernie mo

¹² Mo pou ena ankor boukou kiksoz pou dir zot, me mo prefer pa servi papie ek lank. Mo espere vinn kot zot e koz avek zot fasafas, pou ki nou lazwa li konplet.

¹³ Zanfan to ser ki Bondie finn swazir, fer zot tou konpliman.