2 Tim 4 - Nouvo Testaman Kreol Morisien Harmonisation NTPS KM

Proklam laparol

¹ Mo dimann twa, dan prezans Bondie ek Lekris Zezi ki bizin vini pou ziz bann vivan ek bann mor par so manifestasion ek so regn,

² proklam laparol, insiste touletan pou konvink. Fer repros ou donn lankourazman ki bizin kan to donn lansegnman. Pa perdi pasians.

³ Ler pou arive kot dimounn pou nepli anvi ekout bon lansegnman. Zot pou prefer swiv zot dezir ek ekout bann predikater ki pou vinn met dan zot zorey seki zot anvi tande.

⁴ Zot pou tourn ledo ar laverite pou ekout toutsort kalite zistwar.

⁵ Me twa, gard to lespri kler. Siport leprev, fer to travay predikasion Bonn Nouvel. Ranpli to servis.

⁶ Pou mwa letan finn sone pou gran sakrifis. Mo ler finn arive pou kit sa lavi-la.

⁷ Mo finn konbat bon konba. Mo finn galoup mo lekours, mo finn gard mo lafwa.

⁸ Aster-la, finn ler pou mo gagn kouronn lazistis ki Lesegner, sel bon ziz, pou donn mwa zour zizman. Pa mo tousel, me tou seki finn atann so zour dan lamour.

Remark personel

⁹ Fer enn demars vinn zwenn mwa pli vit ki to kapav.

¹⁰ Demas finn prefer lemond prezan, li finn abandonn mwa; li finn rant dan Tesalonik. Kresenns finn al Galasi, Tit finn al Dalmasi.

¹¹ Selman Lik avek mwa. Pran Mark, amenn li ar twa. Li pou kapav ed mwa isi.

¹² Mo finn avoy Tisik Efez.

¹³ Kan to vini, amenn mo palto ki mo finn lese dan Troas avek Karpis. Amenn bann liv osi, sirtou bann roulo papie.

¹⁴ Alexand, ki enn forzron, finn bien bles mwa; Lesegner pou pini li selon seki li finn fer.

¹⁵ Twa osi, fer atansion ar li, parski li enn adverser terib kont nou predikasion.

¹⁶ Premie fwa kan mo ti ena pou prezant mo defans, pa ti ena personn pou soutenir mwa. Zot tou ti abandonn mwa. Bondie pardonn zot.

¹⁷ Me Lesegner ti avek mwa, li ti donn mwa lafors pou proklam so mesaz devan tou bann payin. Li ti tir mwa dan zot grif.

¹⁸ Lesegner pou delivre mwa ankor dan tou bann piez ek li pou gard mwa pou so rwayom. Laglwar pou li dan leternite. Amen.

¹⁹ Salie Prisil ek Akila ek osi lafami Onesifor.

²⁰ Erast finn res dan Korint. Mo finn les Trofim ki malad dan Mile.

²¹ Fer demars vini avan liver. Ebril, Pidens, Linis, Klodia ek tou bann frer e bann ser salie twa.

²² Mo priye ki Lesegner beni to lavi e donn twa so Lagras.