2 Tim 2 - Nouvo Testaman Kreol Morisien Harmonisation NTPS KM

Vinn enn bon solda Lekris

¹ Timote, mo garson, les Lekris Zezi rann twa pli for.

² To finn temwin mo lansegnman. Mo oule aster-la ki to transmet tousala bann dimounn sir ki pou kapav ansegn lezot.

³ Kouma enn vre solda Zezi Kris, pran to par soufrans.

⁴ Enn vre solda pa mel li ar lavi sivil. Li travay zis pou so sef.

⁵ Okenn atlet pa reisi san respekte bann regleman.

⁶ Planter ki finn travay dir ki resevwar premie par rekolt.

⁷ Mazinn bien seki mo pe dir twa, Bondie pou fer twa trouve.

⁸ Zame bliye Zezi Kris. Li finn resisite. Li finn pran nesans dan fami David, so anset. Samem Bonn Nouvel ki mo anonse.

⁹ Akoz samem mo dan prizon zordi kot pe tret mwa kouma enn kriminel. Me personn pa kapav ansenn Bonn Nouvel.

¹⁰ Mo pe siport tousala pou bann ki Bondie finn swazir. Alor Lekris Zezi pou sov zot ek zot pou gout laglwar eternel.

¹¹ Mo donn twa enn parol sir: si nou mor avek Lekris, nou pou viv avek li.

¹² Si nou res ferm avek li, nou pou regn avek li. Si arive nou renie li, li osi li pou renie nou.

¹³ Me si nou, nou pa fidel, Lekris, li pou res fidel parski zame li renie so Parol.

Enn travayer aprouve par Bondie

¹⁴ Pa les personn bliye tousala. Dimann zot, par nom Bondie, pa vinn diskit ninport. Tousala gaspiyaz pou zorey e li detrir dimounn ki pe ekoute.

¹⁵ Fer tou pou ki Bondie trouv dan twa enn bon travayer ki pa per, ni onte, pou propaz Parol laverite.

¹⁶ Evit bann diskision steril. Sa elwagn dimounn ar Bondie.

¹⁷ Sa kalite palab-la amenn lagangrenn dan kominote. Imene ek Filet ti parmi sa bann dimounn-la.

¹⁸ Zot finn ekart zot ar la verite ek finn amenn skandal kan zot ti pretann ki dimounn mor finn fini resisite.

¹⁹ Me fondasion ki Bondie finn mete li solid. Finn ekrir lor la: Lesegner konn so dimounn. Tou dimounn ki priy Lesegner bizin evit lemal.

²⁰ Dan bann gran lakaz, pena zis bann vaz an-or, an-arzan; ena osi an-dibwa, an-later. Ena ki ena valer, ena pena valer.

²¹ Koumsa mem, seki prezerv limem kont bann erer, li pou parey enn ki ena valer par so pirte. So met pou pran li bien swin ek li pou itil pou tou bann lokazion.

²² Fer atansion bann piez kot zenes rantre san panse. Touzour viv drwat. Pratik lafwa, lasarite, lape avek bann dimounn sinser kan zot invok Lesegner.

²³ Evit bann diskision bet ek initil ki amenn lager.

²⁴ Enn bon serviter Lesegner li pa enn bagarer. Li bizin akeyan anver tou dimounn ek fode li kapav donn lansegnman sir kot li montre pasians.

²⁵ Bizin repran bann adverser avek douser ek imilite. Bondie kapav sanz zot leker ek fer zot trouv laverite.

²⁶ Kapav ramenn zot ver larezon ek tir zot dan file diab kot zot finn maye.