2 Tes 3 - Nouvo Testaman Kreol Morisien Harmonisation NTPS KM

Priye pou nou

¹ Finalman, mo bann frer ek ser, priye pou nou pou ki Parol Lesegner kapav propaze bien vit e ki li onore partou, parey kouma sa ete parmi nou.

² Priye Bondie osi pou ki li delivre nou depi lame bann move dimounn; parski pa tou dimounn ki ena lafwa.

³ Me Lesegner ki fidel, li pou fortifie zot e gard zot proteze kont diab.

⁴ Nou fer zot konfians dan Lesegner; nou kone ki zot pe fer seki bien e ki zot pou kontigne fer bann kitsoz ki nou dir zot fer.

⁵ Ki Lesegner diriz zot leker pou konpran lamour Bondie ek pasians ki Kris ena pou zot.

Li neseser travay, pa fer pares

⁶ Mo bann frer ek ser, lor nom nou Segner Zezi Kris, nou dimann zot pou gard zot distans avek bann krwayan ki pe viv dan dezord e pa pe swiv bann tradision ki nou finn donn zot.

⁷ Zotmem, zot kone kouma zot bizin imit nou; nou pa ti pares kan nou ti kot zot,

⁸ e nou pa ti manz dipin personn san ki nou ti rann gras Bondie. Avek lapenn ek kouraz nou finn travay lanwit-lizour, pou ki nou pa met okenn fardo lor zot.

⁹ Nou fer sa, pa parski nou pena drwa resevwar zot led, me parski nou anvi donn zot enn lexanp pou swiv.

¹⁰ Ofet depi ki nou ti avek zot, nou ti dir, “Kikenn ki pale travay, li bizin pa manze osi.”

¹¹ Parski nou finn tande ki ena parmi zot ki pe amenn enn lavi dezordone, pale fer nanye e zot pas zot letan mel zot ar zafer lezot dimounn.

¹² Nou dimann zot lor nom Segner Zezi Kris, pou ki zot les sa bann dimounn-la travay trankil pou gagn zot dipin.

¹³ Frer ek ser, fode pa zot santi zot fatige pou fer seki bon.

¹⁴ Si kikenn pa obeir mesaz ki dan sa let-la; rey so nom e pa gagn okenn kontak ar li; sa pou fer li gagn onte.

¹⁵ Pa bizin tret li kouma enn lennmi, me averti li kouma enn frer.

Benediksion final

¹⁶ Ki Segner, sours lape, li donn zot limem touletan lape e dan tou sort fason. Ki Bondie res ar zot tou.

¹⁷ Mwa, Pol, avek mo prop lame, mo pe ekrir zot sa bann mo-la. Koumsa mem ki mo sign sak let ki mo ekrir, samem mo lekritir.

¹⁸ Ki lagras nou Segner Zezi Kris res ar zot tou.