2 Tes 2 - Nouvo Testaman Kreol Morisien Harmonisation NTPS KM

Retour Lesegner

¹ Frer ek ser, konsernan retour nou Segner Zezi Kris ek nou rasanbleman avek li, nou sipliy zot,

² pa tro boulverse, oubien trakase, ni par bann fos let swadizan sorti kot nou, ki dir ki zour Lesegner li deza la.

³ Dan ninport ki fason, pa les personn anbet zot parski sa zour-la pa pou arive avan ki gran rebelion kont Bondie arive e sef rebel ki finn destine pou detrir pou aparet.

⁴ Li pou lev kont tou seki dimounn priye ek adore. Li pou instal so tronn dan Tanp Bondie apre sa deklar limem kouma Bondie.

⁵ Zot pa rapel ki mo ti dir zot tou letan ki mo ti ankor avek zot?

⁶ Aster-la zot kone ki pe tini li pou ki li paret selman ler so letan vini.

⁷ Sa pwisans sekre mesanste la, li deza pe travay, me selman kan sa kikenn ki pe tini la, les li fer;

⁸ lerla move rebel-la pou paret e Segner Zezi pou touy li, li pou detrir li avek lafors so retour.

⁹ Move Dimounn pou vini avek lafors Satan, ki pou servi tou pouvwar, tou bann sign pou anbet dimounn.

¹⁰ Li pou servi tou fason pou fer bann ki pe deperi perdi lespwar parski zot pe refiz aksepte lamour ki sov zot.

¹¹ Akoz samem Bondie avoy zot enn fos pwisans pou fer zot krwar dan seki fos.

¹² Alor, tou dimounn ki pa krwar dan laverite e pran plezir dan seki mal, li pou kondane.

Bizin tini ferm

¹³ Nou bizin touzour pe rann gras Bondie pou zot bann frer ek ser, parski Bondie finn swazir zot depi koumansman mem pou sov zot par pouvwar Lespri e par zot krwayans dan laverite, pou fer zot vinn enn pep sin.

¹⁴ Atraver Bonn Nouvel ki nou finn anons zot, Koumsa mem Bondie finn apel zot pou ete. Li finn apel zot pou ki zot gagn zot par dan laglwar nou Segner Zezi Kris.

¹⁵ Mo bann frer ek ser, tini ferm avek sa tradision ki nou finn montre zot la, ki li par parol ou par let.

¹⁶ Ki nou Segner Zezi Kris limem ek Bondie nou Papa ki kontan nou e finn donn enn rekonfor eternel ek enn bon lesperans par so lagras,

¹⁷ li ranpli zot leker avek kouraz e li akord zot lafors pou touzour pratik seki bien, par zot aksion ek zot parol.