2 Pi 3 - Nouvo Testaman Kreol Morisien Harmonisation NTPS KM

Promes retour Lesegner

¹ Mo bann frer ek ser, sa fer deziem let ki mo ekrir zot. Dan toule-de, mo finn sey rapel zot bann souvenir pou stimil zot lespri avek bon panse.

² Zot bizin rapel bann parol ki bann sin profet ti dir, e komannman ki Lesegner ek Sover ti koze atraver bann Zapot.

³ Premie dabor, zot bizin konpran ki dan bann dernie zour, sertin dimounn lespri traver pou mok zot,

⁴ zot pou dir, “Kot li ete seki ti promet pou revini? Depi ki nou anset finn mor tou finn res parey kouma depi koumansman kreasion!”

⁵ Zot bliye ki bien lontan Bondie finn kree lesiel ek later par so parol. Later li finn fer li apartir dilo e avek dilo;

⁶ e li osi par dilo inondasion, ki sa vie lemond-la finn detrir.

⁷ Me, sa mem parol-la finn rezerv lesiel ek later zordi pou dife. Zot finn bien prezerve pou zour zizman ek destriksion bann peser.

⁸ Me, mo bann bieneme, fode pa ki zot bliye ki pou Lesegner, enn zour li parey kouma mil an, e mil an li parey kouma enn sel zour.

⁹ Lesegner, li pa tarde pou realiz so promes, parey kouma sertin dimounn panse, me li pasian avek zot, parski li pa anvi ki enn parmi zot tonbe, me ki zot tou repanti.

¹⁰ Zour Lesegner pou vini kouma enn voler dan lanwit; lerla lesiel pou disparet avek enn gran fraka e tou bann zetwal avek laflam pou dezintegre, e later ek tou seki lor li pou disparet.

¹¹ Si tou kiksoz pou bizin disparet dan sa fason-la, alor ki kalite dimounn nou bizin ete? Zot bizin ena enn lavi sin e respektab devan Bondie.

¹² Letan ki zot pe atann zour Lesegner, zot bizin fer tou zefor pou ki li vinn pli vit. Sa zour-la, lesiel pou pran dife ek disparet e bann zetwal pou fonn ar saler.

¹³ Me, dapre promes Bondie, nou atann enn nouvo lesiel ek enn nouvo later kot pou ena lazistis.

Dernie Exortasion

¹⁴ Akoz samem, mo bann bieneme, letan ki zot pe atann sa zour-la, fer tou seki zot kapav pou ki zot res san tas, san okenn pese e ki li trouv zot pe viv anpe avek li.

¹⁵ Zot bizin konsider pasians nou Segner kouma enn lokazion pou nou akeyir delivrans Bondie, parey kouma nou frer Pol finn ekrir avek lasazes ki Bondie finn donn li.

¹⁶ Samem ki li dir nou dan tou so bann let. Ena sertin pasaz ki difisil pou konpran, ki bann inioran oubien bann ki latet fatige pou deform so sans, kouma zot fer avek lezot pasaz dan Lekritir sin. Sa pou amenn zot destriksion.

¹⁷ Me zot, mo bann bieneme, zot deza averti. Fer atansion, pa les zot antrene par erer bann move dimounn ki rod destabiliz zot.

¹⁸ Kontigne progrese dan lagras ek konesans nou Segner ek Sover Zezi Kris. Laglwar pou li zordi ek dan leternite. Amen.