2 Pi 2 - Nouvo Testaman Kreol Morisien Harmonisation NTPS KM

Fos profet

¹ Me finn ena osi bann fos profet ki finn leve parmi lepep, parey kouma pou ena fos profeser parmi zot ki, dan kasiet pou donn fos lansegnman. Zot pou amenn bann fos doktrinn destriktif e zot pou mem rezet Lemet ki finn sov zot. Akoz sa, zot pou al ver zot prop destriksion.

² Anplis, boukou dimounn pou swiv zot move sime, e akoz sa bann profeser-la, lezot pou dir move kiksoz lor sime laverite.

³ Akoz zot gourmandiz larzan, sa bann dimounn-la pou explwat zot par bann koze malonet. Depi lontan, zizman finn fini pase lor zot e zot destriksion pa lwin.

⁴ Bondie pa finn epargne bann move anz, me finn zet zot dan lanfer, finn ansenn zot dan nwar ziska zour zizman;

⁵ e li pa finn epargne sa vie lemond-la, me li finn avoy enn gran deliz lor so bann move abitan, e li finn sov lavi wit dimounn, parmi Noe, enn predikater lazistis.

⁶ Apre li finn kondann lavil Sodom ek Gomor e li finn detrir li ar dife. Sa pou servi zot lexanp lor seki arive avek bann ki fer pese.

⁷ Li finn delivre Lot ki ti drwat, e ki ti akable par fason imoral ki bann peser ti pe viv.

⁸ Zour apre zour sa zom drwat la finn viv parmi sa bann peser; li ti tourmante par zot move aksion ki li ti trouve ek tande,

⁹ alor Lesegner kone ki fason pou delivre bann dimounn drwat depi zot difikilte e kouma li gard bann peser anba so pinision ziska zour zizman;

¹⁰ spesialman bann ki obeir dezir zot prop laser e mepriz lotorite Bondie. Sa bann fos profeser, zot arogan ek latet dir, zot pena respe pou kreatir lesiel e zot pa per pou insilte zot.

¹¹ Mem bann anz ki normalman pli for e pli pwisan, zot pa akiz sa bann kreatir lesiel devan Lesegner.

¹² Me sa bann dimounn-la azir dapre zot linstin kouma bann zanimo sovaz ki ne pou apre may zot e detrir zot; zot insilte ek atak bann ki zot pa konpran, zot pou gagn zot destriksion.

¹³ Zot pou gagn pinision pou dimal ki zot finn fer. Zot pran plezir pou amenn move lavi dan plin lizour. Kan zot partisip dan zot fet, zot prezans degoutan, fer onte e zot pran plezir koz manti.

¹⁴ Zot lizie zis bon pou komet adilter e zot pa fatige fer pese. Zot antrenn dimounn feb dan piez. Zot leker finn bien antrene pou kontan kas. Malediksion lor zot.

¹⁵ Zot finn kit vre sime, zot finn perdi dan sime Balam, garson Bosor ki ti kontan larzan ki gagne par move travay,

¹⁶ me li ti gagn enn leson pou so pese. Enn bourik ti koze ar profet-la avek enn lavwa imin e so foli ti arete.

¹⁷ Sa bann dimounn-la, zot kouma bann lasours ki pena dilo, bann niaz dirize par divan siklonn. Enn plas dan marenwar finn fini rezerve pou zot.

¹⁸ Zot fer bel-bel diskour ki pena sans; zot servi zot dezir obsenn pou piez lezot ki fek fini sap dan piez bann ki amenn move lavi.

¹⁹ Zot promet liberte, kan zotmem zot esklav pouritir; parski enn dimounn li esklav seki dominn li.

²⁰ Ofet dimounn ki finn kapav sap dan bann move inflians lemond akoz zot finn konn Zezi Kris, nou Segner ek Sover, apre zot remay dan lak, zot sitiasion pou vinn pir ki avan.

²¹ Li ti pou meyer ki zame zot ti konn sime lazistis, ki apre ki zot finn konn li, zot tourn zot ledo ar bann komannman sakre ki finn transmet zot.

²² Seki proverb dir, samem ki finn ariv zot: “Lisien retourn dan so vomi,” “Bengn koson kouma ou anvi. Kouma larg li, li al roul dan labou.”