2 Ko 8 - Nouvo Testaman Kreol Morisien Harmonisation NTPS KM

Ankourazman pou fer enn kolekt

¹ Bann frer ek bann ser, nou anvi ki zot kone kouma lagras Bondie finn manifeste dan bann Legliz Masedwann.

² Zot finn pas par bann leprev bien sever, me zot lazwa telman gran ki, mem dan zot lavi pov, zot finn montre enn gran zenerozite.

³ Mo kapav rasir zot ki bann-la finn donn otan ki zot kapav, e mem plis ki zot kapav.

⁴ Bann-la finn insiste pou gagn privilez servi pep Bondie.

⁵ Li ti plis ki nou ti espere. Dabor bann-la finn donn zotmem Lesegner, apre par volonte Bondie zot finn donn nou zotmem.

⁶ Alor nou finn sipliy Tit ki ti koumans sa travay-la parmi zot, ki li kontign ed zot terminn zot aksion zenere.

⁷ Zot ena plin lafwa, don laparol, konesans, enn zel ki pena limit ek lamour ki nou finn donn zot; alor, nou atann ki zot montre enn gran zenerozite pou lokazion prezan.

⁸ Mo pa pe donn okenn lord la. Si mo pe donn lexanp lezot, mo pe zis donn zot lokazion prouve ki zot lamour li vre.

⁹ Zot konn lagras Zezi Kris, mem si li ti ris, li finn fer li pov pou zot, pou ki par so povrete zot kapav vinn ris.

¹⁰ Mo donn zot mo lopinion lor sa zafer-la: li meyer ki zot terminn seki zot finn koumanse lane pase. Zot pa ti selman premie pou azir, me zot ti premie pou dezir fer sa aksion-la.

¹¹ Aster-la, fini travay-la. Montre volonte pou terminn li, parey kouma zot ti ena pou koumans li. Fer li avek mwayin ki zot ena.

¹² Si zot ena bonn volonte, Bondie aksepte don ki zot done dapre seki zot ena, pa dapre seki zot pena.

¹³ Mo pa pe rod met zot dan difikilte pou ki lezot soulaze, me pou etablir egalite.

¹⁴ Aster-la zot dan labondans e zot kapav ed bann ki pena; enn lot kou, bann ki dan labondans pou ed zot kan zot pena. Koumsa mem pou ena egalite.

¹⁵ Kouma Lekritir dir, “Seki finn ramas boukou, pa finn ena tro boukou, e seki finn ramas tigit, pa finn ena tro tigit.”

Tit al Korint

¹⁶ Nou rann gras Bondie ki finn met dan leker Tit mem lanvi pou ed zot.

¹⁷ Pa selman li finn bien akeyir nou reket; li telman kontan, li finn pran linisiativ pou vinn vizit zot.

¹⁸ Nou finn avoy avek li sa frer ki tou Legliz ena enn gran respe pou travay ki li pe fer pou proklam Bonn Nouvel.

¹⁹ Pli meyer ankor, bann Legliz finn swazir li pou akonpagn nou dan sa mouvman zenerozite la; sa enn servis ki nou fer pou laglwar Bondie e pou montre nou bann bon lintansion.

²⁰ Nou anvi evit tou kritik lor kouma nou pe administre sa don zenere ki finn ramase la.

²¹ Nou oule fer tou kiksoz dan enn fason korek, pa zis devan Bondie, me osi devan tou dimounn.

²² Alor nou pe avoy nou frer ar lezot delege. Souvan nou finn gagn lokazion teste li, e li finn touletan montre li ranpli ar zel, sirtou aster-la parski li ena enn gran konfians dan zot.

²³ Konsernan Tit, li mo konpagnon e li travay ansam ar mwa pou ed zot; bann lezot frer ki pe akonpagn li, zot reprezant bann Legliz e zot pe azir pou laglwar Lekris.

²⁴ Montre bann frer-la zot lamour, koumsa bann Legliz pou trouve ki nou ena rezon koz avek fierte lor zot.