2 Ko 4 - Nouvo Testaman Kreol Morisien Harmonisation NTPS KM

Trezor spiritiel dan enn po later

¹ Parski par mizerikord Bondie, nou ena enn minister pou akonpli, nou pa kapav perdi kouraz.

² Nou finn renons bann plan ki fer dan kasiet ek dan laont; nou pena aksion ki desevwar lezot e nou pa falsifie Parol Bondie. Okontrer, nou fer konn laverite dan enn fason kler devan konsians tou dimounn dan prezans Bondie.

³ E mem si nou Bonn Nouvel vwale, li vwale pou bann ki dan perdision.

⁴ Zot pa krwar parski bondie lemal dan sa lemond-la finn fer zot lespri aveg pou ki zot pa trouv lalimier Bonn Nouvel ki revel laglwar Lekris, ki montre nou kouma Bondie ete exakteman.

⁵ Dan nou predikasion, nou pa anons noumem, me nou proklam Zezi Kris kouma Segner, ek noumem nou zot serviter akoz Zezi.

⁶ Bondie ki ti dir, “Omilie lobskirite lalimier pou briye,” limem ki fer so lalimier briye dan nou leker pou donn nou konesans laglwar Bondie ki reyonn lor figir Lekris.

⁷ Sa trezor spiritiel la nou pe sarye li dan nou, ki kouma bann po later. Koumsa li kler ki sa pwisans extraordiner la li sorti kot Bondie, pa nou ki ena sa.

⁸ Boukou afliksion tom lor nou, me nou pa kraze; ena bel-bel traka, me nou pa dezespere;

⁹ ena persekision, me nou pa abandone; zet nou parter, me nou pa konn destriksion.

¹⁰ Dan nou lekor mortel, nou touletan sarye lamor Zezi pou ki nou lekor revel osi lavi Zezi.

¹¹ An-efe, mem si nou vivan, nou touletan dan danze lamor akoz Zezi, pou ki so lavi revele dan nou lexistans mortel.

¹² Savedir lamor pe fer so travay dan nou, me lavi pe fer so travay dan zot.

¹³ Dan Lekritir finn ekrir, “Mo finn krwar, akoz sa mo finn koze.” Avek sa mem lespri lafwa la, nou osi nou finn krwar ek nou pe koze,

¹⁴ parski nou kone ki Bondie ki finn resisit Lesegner Zezi pou resisit nou osi avek Zezi, e pou amenn nou, ansam ar zot, dan so prezans.

¹⁵ Tousala li pou zot benefis. E letan lagras Bondie tous plis dimounn ankor, sa pou ogmant lapriyer rekonesans ki exprim laglwar Bondie.

Viv par lafwa

¹⁶ Akoz sa nou pa perdi kouraz. Mem si nou kote fizik pe deteryore, nou kote spiritiel pe renouvle zour apre zour.

¹⁷ Bann ti traka tanporer ki ariv nou pe prepar nou pou enn laglwar eternel ki extraordiner.

¹⁸ Nou pa port nou latansion lor seki vizib, me lor seki invizib. Seki vizib li pou enn tan, seki invizib li eternel.