2 Ko 3 - Nouvo Testaman Kreol Morisien Harmonisation NTPS KM

Serviter Nouvo Lalians

¹ Eski ankor enn fwa nou pe flat noumem? Oubien eski nou bizin, kouma sertin lezot dimounn, enn let rekomandasion pou donn zot, oubien pran ar zot?

² Zotmem ki nou let, enn let ki finn ekrir lor nou leker pou ki tou dimounn kone ek lir.

³ Li kler ki zot enn let ki sorti kot Lekris, ki transmet par nou. Li pa finn ekrir ar lank, me avek Lespri Bondie vivan; li pa grave lor bann tablet ros, me dan leker bann imin.

⁴ Nou dir sa parski par Lekris nou ena sa lasirans-la devan Bondie.

⁵ Pa nou ki ena konpetans pou fer sa travay-la, Bondie ki donn nou kapasite.

⁶ Limem ki fer nou vinn enn minis konpetan pou servi nouvo lalians, ki pa depann lor lalwa ki ekrir me lor Lespri. Lalwa amenn lamor, me Lespri donn lavi.

⁷ Si lalwa ki grave let par let lor enn tablet ros, finn vinn dan laglwar, e ki bann-la pa ti mem kapav get figir Moiz akoz li ti reflet sa laglwar-la,

⁸ konbien plis travay Lespri vinn dan enn laglwar ki pli gran ankor.

⁹ Si travay ki amenn kondanasion ti ena laglwar, konbien plis laglwar ena dan travay ki fer enn dimounn vinn zis.

¹⁰ Nou mem kapav dir ki laglwar ki ti briye avan, li finn perdi so lekla devan laglwar ki aster-la prezan, enn laglwar telman siperyer.

¹¹ Si finn ena laglwar dan seki existe zis pou enn letan, konbien plis laglwar pou ena dan seki existe pou touzour!

¹² Akoz nou ena sa kalite lesperans-la ki nou ranpli ar lasirans.

¹³ Nou pa kouma Moiz ki ti met enn vwal devan so figir pou ki bann Izraelit pa trouve ki laglwar-la pe disparet.

¹⁴ Me zot lintelizans ti pe al dan tengn. Mem zordi letan zot lir Ansien Testaman sa vwal-la reste, parski selman par Lekris ki vwal-la tonbe.

¹⁵ Wi, ziska zordi sak fwa ki zot lir liv Moiz enn vwal kouver zot leker.

¹⁶ Me letan enn dimounn tourn ver Lesegner, vwal-la tonbe.

¹⁷ Lesegner limem Lespri, ek la kot Lespri prezan, la ena liberte.

¹⁸ Nou tou, ki nepli ena vwal lor nou figir nou reflet laglwar Lesegner. Lespri pe transform nou pou ki nou resanble Lesegner, avek enn laglwar ki kontign ogmante plis ankor. Sa, li vinn depi Lespri Lesegner.