2 Ko 10 - Nouvo Testaman Kreol Morisien Harmonisation NTPS KM

Pol defann so minister

¹ Par douser ek bonte Lekris, mwa, Pol mo pe fer enn lapel ar zot; mwa ki dimounn dir ki mo “timid” kan mo ar zot, me ki ena “lodas” kan mo lwin.

² Mo sipliye zot, pa les mwa montre mo lodas kan mo vinn kot zot, parski mo pou montre fermte anver bann ki pretann ki nou azir par motivasion imin.

³ Li vre ki nou imin, me li pa vre ki nou konbat dapre manier imin.

⁴ Bann zarm ki nou servi dan nou konba, li pa sorti kot imin, me li bann zarm Bondie ki nou servi pou detrir bann fortres. Nou detrir bann argiman ki fos,

⁵ nou ranvers bann pwisans ki dres avek lorgey kont konesans Bondie, e nou pran tou panse prizonie pou fer zot obeir Lekris.

⁶ Enn fwa ki zot prouve ki zot obeisans li konple, nou pou pare pou pini tou dezobeisans.

⁷ Pa get laparans, get seki devan zot lizie. Si kikenn konsider ki li apartenir ar Lekris, ki li rann limem kont ki nou osi, otan ki li, nou apartenir ar Lekris.

⁸ Mo pa pou onte, mem si mo bizin vant enn tigit tro sa lotorite ki Lesegner finn donn nou pou edifie zot e non pa pou detrir zot.

⁹ Mo pa oule zot krwar ki mo pe rod fer zot per par mo bann let.

¹⁰ Dimounn dir, “Let Pol bien dir ek sever; me kan li parmi nou li feb ek so koze bat dan vid.”

¹¹ Ki sa bann dimounn-la note ki seki nou dir dan let letan nou lwin, samem pou nou aksion letan nou prezan parmi zot.

¹² Nou pena toupe pou klas noumem ou konpar noumem ar sertin ki fer zot fanor. Zot bet! Zot etablir zot prop kriter pou fer konparezon ek zizman lor zotmem.

¹³ Nou pena pou fer fezer e fer krwar nou bann terib, me nou pou res dan limit ki Bondie finn etablir, dan travay ki li finn permet nou fer pou ki nou kapav vinn ziska kot zot.

¹⁴ Letan nou ti vinn kot zot, nou pa ti pe al andeor nou limit. Nou ti bann premie pou vinn ziska kot zot pou amenn Bonn Nouvel Zezi Kris.

¹⁵ Nou pa al andeor limit pou deklar travay ki lezot finn fer. Okontrer, nou espere ki zot lafwa pou ogmante e ki nou pou kapav akonplir enn travay pli gran ankor, me touzour dan limit ki Bondie finn fixe.

¹⁶ Lerla nou kapav amenn Bonn Nouvel dan bann rezion pli lwin ki zot landrwa, san ki nou bizin al deklar travay ki lezot finn fer dan zot prop teritwar.

¹⁷ “Si kikenn anvi vremem fer vantar, ki li montre laglwar Bondie.”

¹⁸ Pa dimounn ki ena bel lopinion lor limem ki gagn rekonesans, me dimounn ki Lesegner rekomande.