1 Zn 5 - Nouvo Testaman Kreol Morisien Harmonisation NTPS KM

Viktwar lor lemond

¹ Tou dimounn ki krwar ki Zezi limem Lekris, li enn zanfan Bondie; e tou dimounn ki kontan enn papa li osi kontan zanfan papa-la.

² Ala kouma nou kone ki nou kontan bann zanfan Bondie: kan nou kontan Bondie e nou obeir so bann komannman.

³ Kan nou kontan Bondie, nou obeir so komannman. So komannman pa difisil pou swiv,

⁴ parski tou zanfan Bondie ena laviktwar lor lemond. Nou lafwa donn nou mwayin pou gagn laviktwar lor lemond.

⁵ Kisann-la ki gagn laviktwar lor lemond? Zis dimounn ki krwar ki Zezi li Garson Bondie.

Temwaniaz lor Garson Bondie

⁶ Zezi Kris, limem ki finn vini avek dilo so batem ek disan so lamor. Li pa finn vinn avek zis dilo, me avek dilo ek disan; e Lespri li rann temwaniaz ki sa vre, parski Lespri limem laverite.

⁷ Ena trwa temwin:

⁸ Lespri, dilo ek disan, e toule trwa dakor.

⁹ Si nou aksepte temwaniaz bann zom, temwaniaz Bondie ena plis pwa; parski samem temwaniaz ki li finn fer lor so Garson.

¹⁰ Dimounn ki krwar dan Garson Bondie, li ena sa temwaniaz-la dan so leker. Dimounn ki pa krwar dan Bondie, li finn fer li pas pou enn manter, parski li pa finn krwar temwaniaz ki Bondie finn done lor so Garson.

¹¹ Ala temwaniaz-la: Bondie finn donn nou lavi eternel, e sa lavi-la li trouv dan so Garson.

¹² Dimounn ki ena Garson Bondie ena lavi-la; dimounn ki pena Garson Bondie, pena lavi.

Lavi eternel

¹³ Zot ki krwar dan nom Garson Bondie, mo pe ekrir tousala pou fer zot kone ki zot ena lavi eternel.

¹⁴ Ala lasirans ki nou ena dan li: tou seki nou demande, li pou akord nou dapre so volonte.

¹⁵ Si nou kone ki li ekout nou lapriyer, nou sir ki li pou donn nou seki nou demann li.

¹⁶ Si kikenn trouv so frer oubien so ser pe komet enn pese ki pa mortel, li bizin priye e Bondie pou donn lavi sa dimounn-la. Sa li aplik pou tou pese ki pa mortel. Ena pese ki mortel; mo pa pe dir zot priye pou sa.

¹⁷ Tou bann move aksion apel pese, me ena pese ki pa mortel.

¹⁸ Nou kone ki dimounn ki pran nesans kot Bondie, pa fer pese, parski Sa-Enn ki finn pran nesans kot Bondie la protez li, e Lemal pa kapav tous li.

¹⁹ Nou kone ki nou zanfan Bondie, e lemond antie li dan pouvwar Lemal.

²⁰ E nou kone ki Garson Bondie finn vini, li finn donn nou lintelizans pou ki nou konn vre Bondie. Nou res ini avek vre Bondie, ini avek so Garson Zezi Kris. Limem vre Bondie e lavi eternel.

²¹ Mo bann ti zanfan, fer atansion bann fos bondie.