1 Zn 2 - Nouvo Testaman Kreol Morisien Harmonisation NTPS KM

Lekris nou avoka

¹ Mo bann ti zanfan, mo pe ekrir zot tousala pou ki zot pa fer pese. Me si kikenn fer pese nou ena enn avoka kot Bondie Papa: Zezi Kris ki zis.

² Li finn ofer limem kouma sakrifis pou nou pese, pa zis pou nou tousel me osi pou pese lemond antie.

³ Si nou gard so komannman, lerla nou sir ki nou konn li.

⁴ Dimounn ki dir, “Mo konn li,” me pa gard so komannman, li enn manter e pena laverite dan li.

⁵ Me dimounn ki gard so parol, lamour Bondie pou vremem parfe dan li. Koumsa mem nou kone ki nou vremem ini avek li.

⁶ Dimounn ki dir li ini avek li, bizin mars parey kouma li.

Nouvo komannman

⁷ Mo bann frer ek ser bieneme, mo pa pe ekrir zot enn nouvo komannman, me enn vie komannman ki zot ti deza resevwar depi koumansman. Sa vie komannman-la, limem parol ki zot finn deza tande.

⁸ Ankor enn fwa, mo pe ekrir zot enn nouvo komannman ki trouv so laverite dan Lekris ek dan zot osi. Vremem, teneb pe disparet e vre lalimier pe briye.

⁹ Dimounn ki dir, “Mo dan lalimier,” apre li ayir so frer ek so ser, li ankor dan teneb.

¹⁰ Dimounn ki kontan so frer ek so ser, li pe viv dan lalimier, e pena nanye dan li ki kapav fer li ek lezot tom dan pese.

¹¹ Me dimounn ki ayir so frer e so ser, li dan teneb, li mars dan teneb, e li pa kone kot li pe ale, parski teneb finn fer li vinn aveg.

¹² Mo bann zanfan, mo pe ekrir zot parski zot pese finn pardone akoz nom Zezi Kris.

¹³ Mo pe ekrir zot, gran dimounn, parski zot konn Sa-Enn ki existe depi koumansman. Mo pe ekrir zot, bann zenes, parski zot finn vink lemal.

¹⁴ Bann zanfan, mo pe ekrir zot, parski zot konn Bondie Papa. Bann gran dimounn, mo pe ekrir zot parski zot konn Sa-Enn ki existe depi koumansman. Bann zenes, mo pe ekrir zot parski zot for, Parol Bondie li abit dan zot, e zot finn vink lemal.

¹⁵ Pa bizin zot kontan lemond, ni bann kiksoz materyel lemond. Dimounn ki kontan lemond, li pena lamour Bondie Papa dan li.

¹⁶ Tou seki sorti dan lemond, kouma move dezir natir imin, lanvi posed seki nou trouve, ek lorgey baze lor larises, pa vinn depi Bondie Papa me depi lemond.

¹⁷ Lemond avek so bann dezir pe al fini, me bann ki fer volonte Bondie pou viv pou touzour.

Lennmi Lekris

¹⁸ Mo bann zanfan, lafin pe aprose. Zot finn tande ki antikris pe vini, aster-la mem ena boukou lennmi Lekris ki finn fini vini. Koumsa mem nou kone ki lafin li pre.

¹⁹ Sa bann zans-la finn sorti kot nou me zot pa ti vremem ar nou, lakoz samem zot inn kit nou; parski si zot ti ar nou, zot ti pou res avek nou, me zot finn fer li kler ki personn parmi zot pa ar nou.

²⁰ Me zot, zot finn resevwar lonksion ki sorti kot Sa-Enn ki Sin e zot ena konesans laverite.

²¹ Mo pe ekrir zot, pa parski zot pa konn laverite, me parski zot bien konn li e zot kone osi ki okenn mansonz pa kapav sorti depi laverite.

²² Kisann-la ki manter? Pa sa dimounn ki rezet Zezi kouma Lekris? Limem lennmi Lekris, li rezet toule-de, Bondie Papa ek so Garson.

²³ Kikenn ki rezet Bondie Garson li pena Bondie Papa dan li. Tou dimounn ki aksepte Bondie Garson li ena osi Bondie Papa.

²⁴ Gard bien mesaz ki zot finn tande depi koumansman. Si zot gard sa mesaz-la, lerla zot pou res ini avek Bondie Garson ek so Papa osi.

²⁵ Samem ki li finn promet nou: lavi eternel.

²⁶ Mo pe ekrir sa lor size bann dimounn pe rod tronp zot.

²⁷ Me zot, sa lonksion ki Lekris finn vers lor zot la, li kontign res ar zot. Kouma zot ena so Lespri dan zot, zot pa bizin enn lot dimounn pou ansegn zot. Anfet, Lespri ansegn zot lor tou kiksoz e tou seki li ansegn zot li vre, li pa fos. Samem zot bizin obeir lansegnman ki sorti kot Lespri: res touzour ini avek Lekris.

²⁸ Aster-la mo bann zanfan, res ini avek li, pou ki ler li revel li, nou kapav ranpli ar lasirans, e nou pa onte devan li zour ki li vini.

²⁹ Si zot kone ki Lekris zis, alor zot osi rekonet ki tou dimounn ki fer seki zis, li enn zanfan Bondie.