1 Tim 5 - Nouvo Testaman Kreol Morisien Harmonisation NTPS KM

Bann diferan responsabilite

¹ Pa koz brit ar enn vie dimounn, me koz ar li kouma to koz ar to papa. Tret bann zennzan kouma to frer.

² Tret bann vie madam kouma to mama, bann zennfi kouma to ser, avek respe.

Bann vev

³ Pran swin bann vev, sirtou seki retrouv zot dan labandon.

⁴ Si enn vev ena zanfan ou ti-zanfan, bizin montre zot kouma met an-pratik zot lafwa anver zot fami e rann zot paran ou gran paran seki zot dwa. Vremem, sa pou fer Bondie plezir.

⁵ Bann vre vev, bann seki tousel, bizin met zot lesperans zis dan Bondie tousel ek priye lanwit-lizour, priye e demann Bondie ed zot.

⁶ Me seki nek pans zis lamizman li deza enn kadav ki pe viv.

⁷ Tousala, to bizin dir pou ki zot san repros.

⁸ Si kikenn pa pran swin so fami, li finn fini renie so lafwa, e sa li pir ki enn dimounn ki pa krwar.

⁹ Pou ki enn vev inskrir li lor lalis, fode ki li ena plis ki swasant-an e ki li finn marye enn sel fwa.

¹⁰ To bizin gete si li ena bon repitasion, si li finn bien elve so bann zanfan, si li finn konn akey dimounn, si li finn met limem oservis bann frer ek ser ki vini, si li finn aport sekour bann malere, si li finn fer dibien ek bann bon aksion.

¹¹ Parkont, pa met bann zenn vev lor lalis.

¹² Kan zot pa kapav tini e ki zot le remarye, zot met Zezi Kris dekote e zot kas zot premie lalians.

¹³ Anplis zot pena nanye pou fer, zot nek marse, al dan tou lakaz, fer palab, koz ninport.

¹⁴ Preferab zot remarye, gagn zanfan e okip zot lakaz pou ki bann adverser pa koz nou koze.

¹⁵ Deza lamem, ena ki finn pran move sime e pe swiv Satan.

¹⁶ Si enn madam krwayan ena vev dan so fami, li bizin pran li ansarz e pa fie lor Legliz parski Legliz bizin okip bann vev ki tousel.

Bann ansien

¹⁷ Bann ansien ki diriz bien Legliz merit enn doub saler, sirtou bann ki bizin travay dir pou prese ek ansegne.

¹⁸ Lekritir dir, “Pa met enn mizelier avek enn bef ki pe kraz dible,” e “Enn zouvriye merit so saler.”

¹⁹ Napa les fer akizasion kont enn ansien si pena de ou trwa temwin.

²⁰ Si kikenn fer pese, repran li an piblik koumsa lezot pou fer atansion.

²¹ Mo sipliy twa, dan prezans Bondie e Zezi Kris, devan tou bann anz beni, obzerv sa bann regleman-la dan enn fason strik, san fer faver personn.

²² Pa inpoz lame vit-vit lor personn, sinon to pou konplis pese lezot. Pran to distans, gard twa prop.

²³ Aret bwar zis dilo, pran inpe divin pou to lestoma, sa pou evit twa gagn febles.

²⁴ Ena dimounn zot pese deor letan get zot; ena lekontrer, plitar ki dekouver zot pese.

²⁵ Mem zafer pou bann bon aksion, pou trouv zot klerman; mem seki pa tro vizib difisil pou kasiet.