1 Tim 3 - Nouvo Testaman Kreol Morisien Harmonisation NTPS KM

Bann levek

¹ Mo donn enn parol sir: si kikenn anvi vinn levek pou vey lor lafwa, li pe dezir fer enn travay nob.

² Levek bizin enn dimounn ki san repros, enn mari fidel, enn dimounn sinp, rezonab e respektab, ki ena lespri ouver e fode li kapav donn lansegnman.

³ Fode pa ki li enn soular, ni kontan lager, ni fer koze vinn long ek kontan larzan. Li bizin enn dimounn trankil ki pena enn lintere personel.

⁴ Li bizin konn diriz so prop fami, bien elve so zanfan ki obeir li avek respe.

⁵ Ki manier enn dimounn pou kapav pran sarz Legliz Bondie si li pa kapav diriz so prop fami?

⁶ Fode pa osi ki li fek konverti, ki li pa ankor fer so prev. Lorgey kapav mont dan so latet e li fini kouma diab.

⁷ Bizin ki dimounn andeor ena boukou lestim pou li, pou ki li pa tom dan laont e anmemtan pa may dan lak diab.

Bann diak

⁸ Mem zafer pou bann diak. Zot bizin respektab ek sinser, pa servi doub langaz, pa soular, ni atase ar larzan.

⁹ Zot bizin gard laverite lafwa dan enn konsians kler.

¹⁰ Bizin teste zot avan. Si pena nanye pou reprose, lerla zot kapav servi kouma diak.

¹¹ Zot fam osi bizin respektab, pa koz zafer dimounn, viv dan sinplisite ek azir kouma enn dimounn ki merit konfians dan tou kiksoz.

¹² Bann diak bizin fidel ar zot madam e gid bien zot zanfan ek zot fami.

¹³ Seki fer so travay bien pou gagn enn bon repitasion e so lafwa dan Zezi Kris pou solid.

Mister lafwa

¹⁴ Mo pe ekrir twa sa let-la, e mo espere zwenn twa biento.

¹⁵ Si zame mo tarde, to kone aster-la ki fason to bizin konport twa dan lakaz Bondie, samem Legliz Bondie ki vivan, kouma enn kolonn ek enn sipor ki tini laverite.

¹⁶ Wi, vremem, mister nou lafwa, li gran. Lekris finn paret kouma enn imin, Lespri Sin finn rann li zis, Bann anz finn kontanple li, Finn anons li kot tou bann pep lemond krwar dan li E li finn mont dan laglwar.