1 Tim 2 - Nouvo Testaman Kreol Morisien Harmonisation NTPS KM

Lapriyer litirzik

¹ Mo fer enn lapel pou ki, avan tou, zot fer lapriyer, zot sipliy Bondie ek zot fer aksiondegras pou tou dimounn,

² pou bann lerwa, tou bann ki ena lotorite, pou ki lape ek trankilite regne e ki nou kapav viv dan lapiete ek dan dignite.

³ Sa li enn gran zafer e li agreab pou Bondie nou Sover

⁴ ki oule sov tou dimounn pou ki zot arive konn laverite.

⁵ Kouma ena enn sel Bondie, ena osi enn sel mediater ant Bondie ek limanite, Zezi Kris limem enn imin

⁶ ki finn met so lavi angaz pou liber tou dimounn. Bondie pe rann so temwaniaz dan ler ki ti fixe.

⁷ Li finn swazir mwa pou proklam so mesaz e li avoy mwa kouma enn zapot pou pran sarz ek pou instrir tou bann ki pa Zwif dan lafwa ek laverite; seki mo pe dir li vre.

Zom ek fam dan lasanble

⁸ Ala kifer, mo pe demande ki dimounn priye partou e touletan, ki zot lev zot lame lao ver lesiel, san fer koler, san lager.

⁹ Lor kestion bann madam dan lasanble, fode ki zot abiy zot dan enn fason korek, abiy zot avek respe ek sinplisite; pa fer bann kwafir konplike, pa orn zot lekor ar bizou, perl, e pa met linz extravagan.

¹⁰ Kouver zot plito ar bann bon aksion; koumsa mem enn fam fer kan li respekte Bondie.

¹¹ Kan pe donn lansegnman, madam bizin res trankil dan limilite.

¹² Mo pa permet enn madam donn lansegnman dan bann sesion, ni dominn zom. Li bizin gard silans.

¹³ Adam ti kree an-premie, apre lerla Ev.

¹⁴ Pa Adam ki ti rant dan piez Satan, me fam-la ki ti finn tom dan piez ek finn dezobeir Bondie,

¹⁵ me so maternite pou sov li. Selman fode ki bann madam persevere dan lafwa, lamour ek amenn enn bon lavi ek gard enn bon zizman.