1 Tim 1 - Nouvo Testaman Kreol Morisien Harmonisation NTPS KM

Pol ekrir Timote

¹ Mwa, Pol, mo finn vinn zapot Zezi Kris gras-a promes Bondie nou Sover ek Zezi Kris nou lesperans.

² Mo pe adres twa sa let-la Timote, twa mo zanfan lwayal dan lafwa; mo demann Bondie Papa ek Zezi Kris nou Segner akord twa so lagras, so pardon ek so lape.

Komba kont bann fos lansegnman

³ Kan mo ti kit Masedwann, mo ti rekomann twa res dan Efez. Ena dimounn pe propaz enn lot lansegnman. To bizin dir zot arete.

⁴ Anpes zot rakont toutsort kalite zistwar ek koz gran-gran koze lor bann anset parski tousala pa servi nanye. Zis par lafwa ki plan Bondie avanse.

⁵ Konpran kifer mo pe donn sa lord-la. Mo oule lamour dan enn leker prop, enn konsians drwat ek enn lafwa sinser.

⁶ Ena finn perdi sime e zot lespri finn egare dan bann diskour ninport.

⁷ Zot pretann ki zot bann koneser lalwa alors ki zot pa mem konpran seki zot pe dir ni seki zot pe ansegne.

Vre rol lalwa

⁸ Nou kone ki lalwa enn bon kiksoz, si konn bien servi li.

⁹ Lalwa pa konsern bann dimounn ki ena bon kondwit. Li pou bann malfeter ek bann rebel, bann move dimounn ek bann peser, bann ki pena respe ni pou Bondie ni pou bann zafer sakre; pou bann ki touy zot papa zot mama, bann asasin,

¹⁰ bann ki amenn move lavi, bann zom ki gagn relasion ant zot; lalwa finn fer pou bann marsan esklav, bann dimounn ki manter e ki zot parol pena valer, e pou tou bann ki komet aksion ki al kont vre lansegnman.

¹¹ Mo tir sa lansegnman-la dan grander Bonn Nouvel ki Bondie Beni, finn konfie mwa.

Loue pardon Zezi Kris

¹² Mo rann gras Zezi Kris nou Segner, mo lafors, parski li finn fer mwa konfians, li finn swazir mwa kouma so serviter.

¹³ Malgre mo ti pe blasfeme, mo ti enn persekiter e mo ti fer violans, zordi, Bondie finn pardonn mwa. Akoz mo liniorans, mo finn azir san lafwa.

¹⁴ Nou Segner finn vers lor mwa ankor plis lagras e li finn akord mwa lafwa ek lamour ki dan Zezi Kris.

¹⁵ Ala enn parol sir ki tou dimounn bizin tande: Zezi Kris finn vinn lor later pou sov bann peser. Parmi bann peser, momem premie;

¹⁶ me mo finn gagn so pardon parski Zezi, atraver mwa, oule manifeste tou so pasians. Mwa mo enn lexanp pou tou seki krwar dan Li pou ki zot gagn lavi eternel.

¹⁷ Tou loner, tou laglwar pou Bondie pou leternite. Li regne pou touzour, li invizib e li tousel Bondie. Amen.

Amenn enn gran konba

¹⁸ Timote, mo garson, kan mo pe fer tou sa bann rekomandasion-la, mo mazinn bann profesi ki konsern twa. Pran sa parol-la kouma enn gid dan sa gran komba ki to ena pou amene la.

¹⁹ Gard to lafwa ek to konsians drwat. Ena dimounn pa finn pran mo parol an konsiderasion e zot lafwa finn fer nofraz.

²⁰ Parmi ena Imene ek Alexand; mo finn livre zot dan lame Satan, zot va konpran ki fode pa blasfeme.