1 Tes 5 - Nouvo Testaman Kreol Morisien Harmonisation NTPS KM

Bizin pare pou retour Zezi

¹ Li pa neseser ki nou ekrir zot, mo bann frer e ser, konsernan ler ek moman ki sa pou arive.

² Parski zotmem zot bien kone ki Lesegner, so zour pou arive parey kouma enn voler dan lanwit.

³ Kan dimounn pou dir: “Ena lape ek sekirite,” lerla mem maler pou fini zot enn sel kou parey kouma douler enn madam ansint ki pe akouse. Zot pa pou kapav sove.

⁴ Me zot, mo bann frer e ser, zot pa dan sa marenwar-la pou ki sa zour-la may zot antret kouma enn voler.

⁵ Zot tou zanfan lalimier e zanfan lizour; nou pa apartenir ni ar lanwit ni ar marenwar.

⁶ Alor anou pa dormi kouma lezot, me anou res eveye ek kalm.

⁷ Bann ki dormi, zot dormi aswar, bann ki soular, zot bwar aswar,

⁸ me nou ki viv dan lalimier lizour, nou bizin res kalm e kontrol noumem. Pran lafwa ek lamour kouma kwiras e lesperans ek delivrans kouma enn elmet lor nou latet.

⁹ Bondie pa finn fer nou pou soufer pinision me pou gagn delivrans par nou Segner Zezi Kris,

¹⁰ ki finn mor pou nou, pou ki nou kapav viv ini avek limem si nou eveye ou pe dormi.

¹¹ Alor ankouraz zotmem e fortifie zot bien, parey kouma zot deza pe fer.

Rekomandasion final

¹² Mo bann frer e ser, nou pe dimann zot pou respekte bann ki pe travay parmi zot, ki instrir zot, e ki ansarz zot devan Lesegner.

¹³ Ena boukou estim pou zot akoz travay ki zot fer. Ki ena lape parmi zot.

¹⁴ Nou pe sipliy zot, frer ek ser, pou averti bann ki pares, ankouraz bann ki gagn per, ed bann feb, ena pasians pou zot tou.

¹⁵ Asir zot ki personn pa rann lemal par lemal, me rod touzour fer seki bien ant zot e pou tou lezot dimounn.

¹⁶ Res touzour dan lazwa.

¹⁷ Priye touletan.

¹⁸ Rann gras dan ninport ki sirkonstans, parski samem volonte Bondie pou zot dan zot lavi avek Zezi Kris.

¹⁹ Pa met baryer dan travay Lespri Sin.

²⁰ Pa mepriz mesaz bann profet;

²¹ examinn tou kiksoz avek disernman e gard seki bon.

²² Evit tou seki asosie ar lemal.

²³ Ki Bondie lape rann zot sin limem dan tou fason, ki li gard ferm zot lespri, ek zot lekor san okenn repros letan Zezi Kris nou Segner pou retourne.

²⁴ Seki apel zot li fidel e li fer seki li dir.

²⁵ Mo bann frer e ser, priye osi pou nou.

²⁶ Fer konpliman tou bann frer e ser, anbras zot tou.

²⁷ Mo sipliy zot lor nom Lesegner, lir sa let-la avek tou zot bann frer e ser.

²⁸ Ki lagras Zezi Kris nou Segner res avek zot.