1 Tes 2 - Nouvo Testaman Kreol Morisien Harmonisation NTPS KM

Minister Pol dan Tesalonik

¹ Frer ek Ser, zot bien kone ki nou pa finn vinn kot zot pou nanye.

² Kouma zot kone, nou finn gagn maltrete e nou finn soufer dan Filip, me nou ti ena kouraz dan nou Bondie pou anons zot Bonn Nouvel Bondie malgre tou lopozision.

³ Ofet, lapel ki nou pe adres zot tou, li pa baze lor bann fos mesaz ouswa bann motif inpir, nou pa anvi trik personn.

⁴ Okontrer, parey kouma Bondie finn konfie nou so Bonn Nouvel, nou pa koze pou fer plezir bann imin me pou fer plezir Bondie ki teste nou leker.

⁵ Kouma zot kone e Bondie temwin, zame nou pa finn servi bann parol pou flat noumem oubien pou kasiet gourmandiz materyel.

⁶ Nou pa finn rod okenn loner ar personn, ni ar zot ni ar lezot dimounn,

⁷ pourtan, nou ti kapav inpoz lor zot nou lotorite kouma bann zapot Kris. Okontrer nou finn ena enn leker zanfan vizavi zot, parey kouma enn mama pran swin so zanfan.

⁸ Nou lafeksion pou zot li telman gran ki nou ti pare pou partaz avek zot, pa zis Bonn Nouvel Bondie me osi nou prop lavi, telman zot ti finn vinn pros ar nou.

⁹ Frer ek ser, zot rapel nou lapenn ek nou travay. Nou finn trime lanwit-lizour pou ki nou pa enn fardo pou zot letan ki nou pe anons zot Bonn Nouvel Bondie.

¹⁰ Ansam avek Bondie, zot temwin, ki manier nou finn ena enn kondwit sin ek san repros vizavi zot, bann krwayan.

¹¹ Kouma zot kone, nou finn tret sakenn parmi zot kouma enn papa tret so bann zanfan.

¹² Nou finn ankouraz zot, rekonfort zot ek plede pou ki zot amenn enn lavi korek ki onor Bondie, ki apel zot pou partaz ar li so rwayom ek so laglwar.

¹³ Nou touzour pe rann gras Bondie parski letan nou finn anons zot so Parol, zot finn ekoute e zot finn aksepte li, pa kouma enn parol imin me kouma enn parol ki vremem sorti kot Bondie e ki pe azir dan zot, bann krwayan.

¹⁴ Ofet, mo bann frer ek ser, zot finn swiv lexanp bann dimounn ki dan legliz Bondie dan Zide ki krwar dan Zezi Kris. Zot prop pep finn persekit zot, parey kouma bann-la ti sibir ar bann Zwif,

¹⁵ ki ti touy Zezi ek bann profet. Zot finn osi persekit nou. Zot pa fer plezir Bondie e zot lennmi tou dimounn.

¹⁶ Zot anpes nou anons bann payin mesaz ki kapav sov zot. Tou sa letan-la zot finn kontigne fer pese e samem zot dernie pese. Me zizman Bondie finalman finn tom lor zot.

Pol anvi retrouv bann Tesalonisien

¹⁷ Mo bann frer ek ser, mem si nou finn separe fizikman ar zot pou enn ti letan, zot touzour dan nou panse. Pandan sa letan-la zot ti mank nou boukou, me nou ti ena enn gran dezir pou retrouv zot ankor.

¹⁸ Akoz samem nou ti anvi vinn vizit zot, sirtou mwa Pol, mo finn eseye plizir fwa, me Satan finn anpes nou.

¹⁹ Apre tou, zotmem nou lesperans, nou lazwa. Zot pou parey kouma enn kouronn doner pou nou dan prezans nou Segner Zezi letan li retourne.

²⁰ Wi, zotmem nou laglwar ek nou lazwa.