1 Pi 5 - Nouvo Testaman Kreol Morisien Harmonisation NTPS KM

Pran kont troupo Bondie

¹ Aster-la momem, kouma enn ansien ek kikenn ki temwin bann soufrans Kris e ki ena so par dan laglwar ki pou revele, mo fer enn lapel ar bann sef Legliz ki la parmi zot:

² pran bien swin troupo Bondie ki anba zot responsabilite; vey lor li, pa par obligasion me par amour; fer zot travay par devouman e non pa par intere.

³ Pa fer dominer ar bann ki anba zot, me vinn enn lexanp ki zot troupo pou kapav swiv.

⁴ E kan sef berze paret, zot pou resevwar enn kouronn laglwar ki pou briye pou touzour.

⁵ Zot osi, bann zenn, zot bizin aksepte lotorite bann ansien. Zot tou bizin met lor zot enn tabliye ki apel limilite pou zot servi zot kamarad, parski Lekritir dir: “Bondie li kont bann ki ena lorgey, me li donn so lagras bann ki viv dan limilite.”

⁶ Zot bizin kourb zot devan lame pwisan Bondie, pou ki li kapav lev zot lao-lao kan ler arive.

⁷ Met tou zot traka lor li, parski li pran zot swin.

⁸ Pa fer zes; veye kouma bizin! Zot lennmi diab pe fer letour kouma enn lion feros; li pe rod kikenn pou devore.

⁹ Res touzour ferm dan lafwa e reziste li, parski zot kone ki zot bann frer ek ser dan lemond antie pe pas par mem kalite soufrans.

¹⁰ Zot ena pou soufer ankor inpe letan. Bondie, ki lasours lagras, ki finn apel zot pou so laglwar eternel dan Zezi Kris, pou limem beni zot, donn zot lafors ek ranz zot lexistans lor enn baz solid.

¹¹ Pouvwar pou li pou touzour. Amen.

Dernie salitasion

¹² Mo pe ekrir zot sa ti let-la avek led Silas, ki mo konsider kouma enn frer serye, pou ankouraz zot e pou sertifie ki samem vre lagras Bondie; zot bizin tini ferm ladan.

¹³ Legliz dan Babilonn avoy zot so konpliman; Mark osi parey.

¹⁴ Salie e anbras zot kamarad. Ki lape res ar zot tou ki pe viv dan Zezi Kris.