1 Pi 3 - Nouvo Testaman Kreol Morisien Harmonisation NTPS KM

Temwaniaz Kretien dan lavi konzigal

¹ Bann madam, zot osi, soumet ar zot mari. Mem si sertin mari pa krwar Parol Bondie, zot pou kapav benefisie atraver konportman zot fam,

² ler zot dekouver pirte ek respe ki zot ena pou zot lavi.

³ Pa rod fer zoli ar zestaz exteryer kouma tres seve, met bizou lor ek zoli linz;

⁴ me plito ena enn leker dou avek enn lespri trankil ki zame pa pou gate; e sa enn kado presie sorti depi leker Bondie.

⁵ Lontan, koumsa mem bann fam piez ti ete. Zot ti met zot lesperans dan Bondie e zot ti aksepte lotorite zot mari.

⁶ Koumsa mem Sara ti obeir Abraam e ti apel li Segner. Aster-la zot, so bann tifi, fer seki bon e zot pa les lafreyer paraliz zot lespri.

⁷ Zot osi, bann mari, montre konsiderasion pou zot madam parski bann-la pa osi for ki zot. Tret zot avek respe parski zot osi zot eritie lagras Bondie. Lerla nanye pa pou kapav blok zot lapriyer.

⁸ Finalman, zot tou, zot bizin ena mem lespri, mem konpasion ek mem santiman lamour ant zot. Ena enn bon leker e viv avek limilite.

⁹ Pa rann lemal par lemal, oubien, insilt pou insilt; okontrer reponn par enn benediksion, parski Bondie finn promet zot benediksion kan li finn apel zot.

¹⁰ Ofet “Bann ki anvi zwir lavi e anvi viv ere, ki zot aret koz dimal e aret koz manti.

¹¹ Zot bizin rezet lemal e fer dibien; Zot bizin lite an faver lape ar tou lafors zot leker.

¹² Parski Lesegner vey lor bann ki fidel, e li pre pou ekout zot lapriyer. Me Lesegner li kont bann ki fer ditor.”

¹³ E kisann-la pou fer zot ditor si zot vremem anvi fer dibien?

¹⁴ Me, mem si zot soufer pou fer dibien, Bondie pou beni zot. Pa bizin per personn e pa kas latet,

¹⁵ me dan zot leker onor Kris kouma zot Segner. Touletan zot bizin pare pou defann zot lafwa kan dimounn dimann zot explik lesperans ki dan zot;

¹⁶ alor fer li avek zantiyes ek respe. Gard zot konsians kler, pou ki letan zot gagn insilte, bann ki dir dimal lor zot bonn kondwit kouma Kretien, zot pou onte ar seki zot pe dir.

¹⁷ Parski vomie zot soufer pou fer dibien, si samem volonte Bondie, plito ki fer ditor.

¹⁸ Ofet, Zezi Kris limem li finn soufer pou pese tou dimounn; parey kouma enn inosan li finn mor pou bann koupab, pou li kapav amenn zot kot Bondie. Fizikman zot finn touy li, me li finn reviv spiritielman,

¹⁹ e dan sa leta spiritiel-la, li finn al pres ar bann lespri anprizone.

²⁰ Sa bann lespri-la, dan letan lontan, pa ti obeir Bondie kan li ti pe atann ar boukou pasians dan lepok Noe ti pe aranz lars. Enn tigit dimounn, zis wit, ti sap dan deliz.

²¹ Sa enn fason pou montre batem ki pe sov zot aster-la; pa pou lav inpirte dan zot lekor, me kouma enn langazman ar Bondie pou enn konsians prop; li sov zot par rezireksion Zezi Kris,

²² ki finn al dan lesiel e dan kote drwat Bondie, la kot li pe regne lor bann anz ek lezot pwisans ek lotorite lesiel.