1 Ko 6 - Nouvo Testaman Kreol Morisien Harmonisation NTPS KM

Bann Krwayan pourswiv zot kamarad

¹ Kan enn parmi zot pa dakor ar enn lot krwayan, kouma zot oze amenn sa krwayan-la devan lakour bann non-krwayan pou ziz li, olie ki zot amenn sa ka-la devan lezot manb pep Bondie ki bann krwayan?

² Zot pa kone ki pep Bondie ki pou ziz lemond? Si zot ki pou ziz lemond, eski zot pa kapav ziz bann ti problem?

³ Zot pa kone ki nou ki pou ziz bann anz? Alors, sirman nou kapav ziz bann zafer toulezour.

⁴ Kan zot ena bann konfli koumsa, zot etablir bann ziz ki pena lestim Legliz?

⁵ Les mo demann zot enn kiksoz ki pou anbaras zot: eski pena personn parmi zot ki ena ase sazes pou ziz enn konfli ant bann krwayan?

⁶ Enn frer trenn enn lot devan lakour pou ki non-krwayan fer zizman!

⁷ Ofet, parski zot ena bann ka lakour ant zot, li deza enn defet pou zot. Kifer zot pa siport linzistis? Li pa meyer ki zot les zotmem depouye?

⁸ Me non, okontrer zot ki fer linzistis e ki depouy lezot, e zot fer sa ar zot prop frer, zot prop ser!

⁹ Zot pa kone ki seki pratik lemal pa erit Rwayom Bondie? Pa anbet zotmem. Bann ki pratik imoralite, idolatri, adilter, bann efemine ek bann omosexiel,

¹⁰ voler, akaparer, soular, bann ki dir dimal lor Bondie ek bann eskro, pa erit Rwayom Bondie.

¹¹ Ala kouma sertin parmi zot ti ete. Me nou Segner Zezi ek Lespri Bondie finn pirifie zot, finn sanktifie zot, ek finn met zot drwat devan Bondie.

Servi nou lekor pou glorifie Bondie

¹² Ena koze ki dir, “Nou kapav fer seki nou anvi,” e pourtan, pa tou kiksoz ki korek; “Nou kapav fer seki nou anvi,” me mo pa pou les mwa vinn esklav ninport kwa.

¹³ Ena enn koze ki dir, “Manze finn fer pou ranpli vant, vant finn fer pou manze,” me Bondie pou detrir toule-de. Nou pa kapav fer seki nou anvi avek nou lekor. Nou lekor li pou Lesegner, e Lesegner li pou nou lekor.

¹⁴ Par so pwisans, Bondie finn resisit Lesegner depi lamor, e li pou fer nou osi resisite.

¹⁵ Zot pa kone ki zot lekor li form parti lekor Lekris? Eski mo pou pran enn manb lekor Lekris ek mo fer li vinn enn parti lekor enn prostitie? Zame!

¹⁶ Zot pa kone ki enn dimounn ki inir limem ar enn prostitie li vinn enn sel ar li? Lekritir dir, “Toule-de pou vinn enn sel.”

¹⁷ Me seki inir limem ar Lesegner li vinn enn sel lespri avek Lesegner.

¹⁸ Zot bizin sove devan limoralite sexiel. Tou lezot pese ki enn zom fer, bann pese-la andeor so lekor. Me zom ki livre limem dan pese imoralite li fer pese kont so prop lekor.

¹⁹ Zot pa kone ki zot lekor enn Tanp Lespri Bondie, ki li viv dan zot, e ki Bondie ki finn donn zot sa Lespri-la? Alor zot pa apartenir ar zotmem;

²⁰ finn pey enn gro pri pou aste zot. Alor rann glwar Bondie avek zot lekor.